Тазалық талаптары – бәріне ортақ

Қазақстанда жолаушылар пойызы – ең көп сұраныстағы және қолжетімді көлік. Алайда, жолаушылардың қауіпсіздігі мен жайлылығын қамтамасыз ету үшін санитарлық-эпидемиологиялық талаптарды қатаң сақтау қажет.

ҚР ДСМ СЭБК Көліктегі санитарлық-эпидемиологиялық бақылау департаментінің басшысы, көліктегі бас мемлекеттік санитарлық дәрігер Жанар Уразалина жолаушылар пойыздарын пайдалануға қойылатын санитарлық-эпидемиологиялық талаптар туралы айтып берді.  

– Жолаушылар пойыздарының вагондары тазалық пен гигиенаны сақтауға бағытталған іс-шаралар кешенінен өтеді. Бұған сыртқы жуу, дезинфекциялау, жабдықты жөндеу, вагондардың ішін тазалау, ауыз су мен жанармай құю кіреді. Сондай-ақ санитарлық құрал-жабдықтар мен медициналық керек-жарақтар қамтамасыз етіледі, – дейді департамент басшысы.  

Оның айтуынша, жолаушылар пойыздарын құрастыру пункттерінде вагондардың сыртын жуу, дезинфекциялық өңдеу, ішкі және санитарлық-техникалық жабдықтарды жөндеу, желдету жүйесін тазарту, вагондардың ішін және жабдықтарды жинау, ауыз су және отын құю, вагондарды алмалы-салмалы мүкәммал заттармен – таза, құрғақ ақаулары жоқ төсек-орын жабдықтары жиынтығымен қамтамасыз ету, жуу және дезинфекциялау құралдарымен жарақтандыру және медициналық қобдишаны дәрі-дәрмектермен толықтыру, т.т. жұмыстары жүргізіледі.  

– Сонымен қатар жәндіктер мен кеміргіштерге қарсы дезинсекциялау және дератизациялау тұрақты түрде жүргізіледі. Вагондарды дезинсекциялық өңдеу айына 1 реттен, ал дератизациялық өңдеу тоқсанына 1 реттен жүргізіледі. Жолаушылар пойызының әрбір вагонында қолжетімді жерде вагонның ішін тазалау кестесі ілінеді. Төсек-орын – матрастар, жастықтар, қысқы көрпелер жылына екі рет шаңнан тазартылады және камералық өңделеді. Камералық зарарсыздандыруға жатпайтын синтетикалық толтырғышы бар матрастар мен жастықтар тоқсанына бір рет дезинфекциялық өңдеуден өтеді. Жазғы көрпелер айына екі рет химиялық тазаланады, – дейді ол.  

Матрас пен жастық қаптары айына кемінде бір рет жуылады. Жастық тыстары, жаймалар, көрпе жамылғылары әр рейстен кейін ауыстырылады. Кілемшелер тоқсанына бір реттен сиретпей жуылады немесе химиялық тазартылады. Рейске жөнелту алдында және ластануына қарай көп рет пайдаланылатын ыдыс-аяқ пен асхана аспаптары жуу және дезинфекциялау құралдарымен ыстық сумен жуылады.  

Вагондар сыртқы және ішкі өңдеу аяқталғаннан кейін алмалы-салмалы мүкәммалмен, шайға керек-жарақтармен және ыдыспен, сабынмен, дәретхана қағазымен, қағаз сүлгілермен жабдықталады. Жолаушылар төсек-орын жабдықтарымен қамтамасыз етіледі.  

Жолаушылар пойыздарында осынау санитарлық нормаларды сақтау – ұлттық тасымылдаушы «Жолаушылар тасымалы» АҚ-дан бөлек, барлық жекеменшік тасымалдаушыларға да ортақ міндет.