«Ақтөбе-Қазалы» бағыты бойынша рейс ашылды
Ақтөбе облысы бойынша меншікті тілші
2 сәуірден бастап №630 пойызы «Ақтөбе-Қазалы» бағыты бойынша рейске шықты. Қалааралық қатынас Ақтөбеден жұп, Қазалыдан тақ күндері ұйымдастырылған.
«Жолаушылар тасымалы» АҚ «Батыс» өңірлік филиалы өткен жылдың қазан айында іске қосылған «Ақтөбе-Шалқар» пойызының бағытын Қазалы бекетіне дейін ұзартылғанын хабарлады.
«Мұның бәрі – жолаушыларға қызмет көрсету сапасын жақсартуға бағытталған жұмыстар. Жаңа қалааралық рейс ақтөбеліктерге ыңғайлы болу үшін кешкі уақытта шығады. Бүгінгі салтанатты шараға Батыс филиалы мен Бөлімше басшылары қатысып, жергілікті тұрғындар өтінішіне орай маршруты ұзарып отырған қалааралық пойыздың сапарына сәттілік тіледі», – деді вокзал басшысы Арсен Кенжин.
Пойыз Ақтөбеден жұп күндері сағат 22.25-те жөнелтіліп, келесі күні сағат 11.32-де Қазалыға жетеді. Ал «Қазалы-Ақтөбе» бағыты бойынша №629 пойыз тақ күндері сағат 18.20-да жүріп, келесі күні сағат 7.34-те Ақтөбеге жетеді.
Шалқарға жол жүру құны өзгеріссіз қалады. Ақтөбеден Қазалыға бару үшін билет құны плацкарт вагонында 5 786 теңге болса, купе 8 581 теңгені құрайды. №630 пойыздың Қазалыға алғашқы сапары 2 сәуірде Ақтөбе теміржол станциясының вокзалынан бастау алды.