Comfort+ санатындағы жаңа электропойыз «Астана – Қарағанды» бағытына жолға шықты
«Жолаушылар тасымалы» АҚ жолаушыларға арналған қызмет сапасын арттыру мақсатында №6857/6858 «Астана – Қарағанды» бағыты бойынша жаңа үлгідегі Comfort+ санатындағы электропойызды іске қосты. Үшінші класты бұл заманауи құрам жоғары жайлылықты қамтамасыз етіп, қазіргі заманғы еуропалық стандарттарға толық сай келеді. Алты вагоннан тұратын пойыз 576 жолаушыға арналған. Салон кең әрі жарық, интерьері жаңаша, деп хабарлайды Rail-news.kz.
Жаңа электропойызда барлық жолаушылар үшін қолайлы жағдай жасауға баса назар аударылған. Әр вагонда биотуалеттер орнатылған, оның ішінде мүмкіндігі шектеулі азаматтарға арналған арнайы санитарлық тораптар бар. Құрамның екі жағында орнатылған көтергіш құрылғылар мүмкіндігі шектеулі жолаушылардың пойызға еркін және кедергісіз кіруіне толық мүмкіндік береді.
Қарт адамдар мен балалармен бірге жүрген жолаушылар үшін автоматты табалдырықтар орнатылған. Сондай-ақ, әр орында құрылғыларды қуаттауға арналған USB-розеткалар бар. Вагон ішінде жеңіл тағам мен сусын алуға арналған вендинг автоматтары қойылған.
Пойыздың сыртқы келбеті де жаңартылып, Ұлттық тасымалдаушының бірыңғай фирмалық стиліне сай безендірілген. Машинист кабинасы көп позициялық реттелетін, эргономикалық жайлы орындармен жабдықталған, бұл ұзақ сапар кезінде еңбек жағдайын едәуір жеңілдетеді.
Электропойыз күн сайын, кестеге сәйкес, тұрақты түрде қатынайды. Билет құны – 3 202 теңге.
«Жолаушылар тасымалы» АҚ жылжымалы құрамды кезең-кезеңімен жаңарту бағдарламасы аясында маусым айының соңына дейін бірінші, екінші және үшінші санаттағы тағы алты жаңа электропойызды пайдалануға беруді жоспарлап отыр.
