ҚТЖ «Jibek Joly 5.0» туристік пойызының жаңа маусымын іске қосады
19 қыркүйекте «Жолаушылар тасымалы» АҚ ұйымдастырған «Jibek Joly 5.0» туристік пойызының жаңа маусымы басталады. 6 күнге созылатын сапар барысында жолаушылар Алматы – Түркістан – Отырар – Самарқанд – Бұхара – Ташкент – Алматы бағытымен жүріп өтіп, Ұлы Жібек жолының бойындағы тарихи және мәдени орындармен танысады, деп хабарлайды Rail-news.kz.
Айта кетейік, туристік пойыздың кезекті маусымын іске қосу – Ұлттық тасымалдаушы үшін дәстүрге айналған. Бұл жолғы құрамы – Қазақстан мен Өзбекстан арасында қатынайтын «Jibek Joly» туристік пойызының бесінші сапары. Бұған дейінгі маусымдарда бұл турға 1000-наң астам турист қатысқан.
Туристік пойыз заманауи, жайлы, отандық өндірістен шыққан вагондардан құралған. Іші ұлттық нақыштағы дәстүрлі ою-өрнектермен безендірілген. «Jibek Joly» пойызы 5 вагоннан тұрады (оның ішінде 4 купе және 1 мейрамхана вагоны бар).
Бағыт Қазақстан мен Өзбекстанның мәдени және тарихи орталықтарын қамтиды. Алты күн ішінде тур қатысушылары Хожа Ахмет Ясауи кесенесі, Отырар қалашығы, Бұхарадағы Арк қамалы мен Ляби-Хауз алаңы, Самарқандтағы Әмір Темір кесенесі мен Регистан алаңы, Ташкенттегі Төле би кесенесі мен Хазрет Имам мемориалдық кешені сияқты ірі сәулет және тарихи ескерткіштерді аралайды.
Туристік пакет құнына пойызбен жол жүру, кәсіби гидтермен бірге жүретін туристік бағдарлама, экскурсиялар мен барлық кіру билеттері, сондай-ақ туроператорлар ұйымдастырған трансферлер кіреді.
Туристік пойыз ҚТЖ компаниясының бастамасымен, «Өзбекстан темір жолдары», ҚР Туризм комитеті, Көлік министрлігі және Kazakh Tourism қолдауымен ұйымдастырылған. «Jibek Joly» туристік пойызын іске қосу – теміржол туризмін дамыту жолындағы маңызды қадам, ол Қазақстан мен Өзбекстан арасындағы мәдени байланысты нығайтып, өңірдің тарихи мұрасын кеңінен насихаттауға ықпал етеді.
Тур туралы барлық сұрақтар бойынша келесі байланыс нөмірлеріне хабарласуға болады: WhatsApp: +7 777 254 43 35, +7 702 218 68 09, +7 775 942 94 95.