Бес облысты басып өтетін жаңа маршрут
Маңғыстау облысы бойынша меншікті тілші
1 сәуірден Қарағанды – Маңғыстау бағытында жаңа пойыз іске қосылды. Бұрын бірнеше пойызға ауысып мініп, бірінен соң бірін сағаттап күтіп әуреге түсетін жолаушы халық енді Маңғыстау мен Қарағанды арасында еш кедергісіз тіке қатынайтын болды.
Батыс аймағы мен Орталық Қазақстанды тікелей байланыстыратын маршрут Ақтөбе, Қызылорда, Ұлытау облыстарын басып өтеді. Ірі станциялардан Шалқар, Сексеуіл, Қоскөл, Жезқазған, Қызылжар, Жаңаарқаға тоқтайды. Сәуірдің бірінші күні Қарағандыдан шыққан пойыз Маңғыстау вокзалына үшінші күні жетті.
Пойыз құрамы 3 плацкартты, 3 купелік және мүмкіндігі шектеулі жандарға арналған орындар қарастырылған, барлығы 6-7 вагоннан тұрады.
– №079-080 Маңғыстау-Қарағанды, Қарағанды-Маңғыстау пойызы екі бағытта да аптаның тек тақ күндері, аптасы үш рет қатынайды. Билет бағасы плацкарт үшін 14 207 теңге, купеге 21 863 теңге. Қарағандыдан кешкі сағат 19:45 уақытында шыққан пойыз жолда, 40 сағат 56 минут жүріп, түбекке түскі 12:08 уақытында жетеді. Кері бағытта Маңғыстаудан 14:34 шығады. Маршрутты ұйымдастырушы «Ұлытау» жекеменшік тасымалдау компаниясы, – дейді «Жолаушылар тасымалы» АҚ «Батыс» аймақтық филиалы Маңғыстау телімі бастығы Мырзабек Сүйінғарин.