Жолаушылар тасымалының үздік ұжымы

«Жолаушылар тасымалы» АҚ «Солтүстік» аймақтық филиалының еңбек ұжымы биыл теміржолшылардың кәсіби мерекесі қарсаңында «Үздік теміржол ұжымы» аталымы бойынша жеңімпаздар қатарынан табылды.

2025 жылдың жұмыс қорытындысы бойынша үздік теміржол ұжымын анықтау үшін «Жолаушылар тасымалы» АҚ байқау өткізіп, оған Қоғамның «Солтүстік», «Оңтүстік» және «Батыс» аймақтық филиалдарымен қатар «Экспресс», «Қала маңы тасымалы» филиалдары қатысты. Қоғам тарапынан құрылған комиссия филиалдардың мақсат-міндеттерімен байланысты барлық критерийлер бойынша олардың жұмыстарына рейтінгілік бағалау жүргізді. Бағалау барысында әлеуметтік және тұрмыстық жағдайларды жақсартуға бағытталған жұмыстарға, құқықтық істің қозғалуына, сыбайлас жемқорлық құқықбұзушылықтары үшін қызметкерлерді жұмыстан босатуға және Қоғамның бөлімшелеріндегі қызметкерлердің шағымдарына ерекше назар аударылды.  

2026 жылдың қаңтарынан бастап Компанияның бөлімшелері мен өндірістік орындарында қызметкерлердің денсаулық пен әл-ауқат жағдайын бағалау мақсатында тексеру жүргізілді. Бағалау аясында бұрын анықталған бұзушылықтарды жою, қызметкерлердің санитарлық және тұрмыстық жағдайларын жақсарту бойынша жүргізілген жұмыстар мен ғимараттарға, жасанды құрылыстарға жасалған жөндеулерге визуалды тексеру жүргізілді.  

Осылайша, рейтингілік бағалау нәтижесі бойынша «Жолаушылар тасымалы» АҚ-ның үш үздік еңбек ұжымы анықталды. 90 балдық нәтижемен «Солтүстік» аймақтық филиалы бірінші орын мінберіне көтерілсе, 87 және 86 балдық нәтижелермен «Қала маңы тасымалы» және «Экспресс» филиалдары екінші және үшінші орындарды өзара бөлісті.  

«Солтүстік» аймақтық филиалына қарасты үш учаске бар. Олар – Астана, Қарағанды және Павлодар учаскелері. Ақмола, Солтүстік Қазақстан, Қарағанды, Қостанай, Павлодар және Ұлытау – барлығы алты облыс вокзалдарында билет кассалары қызмет жасайды. Сонымен қатар филиал құрамында 55 пойыз бригадасы жұмыс істейді. Екі халықаралық бағытта қызмет көрсетеді: Қарағанды – Мәскеу және Астана – Омбы бағыттары. Ал республика бойынша 14 бағытта жолаушылар тасымалына қызмет көрсетеді. Міне, ауқымы өте кең осы филиалдың директоры Замира Есмұратова ұжымның әрбір мүшесін моральдық және материалдық тұрғыда ынталандырған жетістік сыры – адал еңбек деп санайды.  

– Біздің басты мақсатымыз – бізге сеніп тапсырылған қызметті жауапкершілікпен атқарып, сенім үдесінен шыға білу. Ол үшін еңбек және техникалық қауіпсіздік талаптарын орындап, жолаушыларға көрсетілетін қызмет сапасын арттырып, өз жұмысымызды адал атқару. Үздік атанып отырсақ, барлық талапқа сай болғанымыз деп ойлаймын. Мұнда біздің үлкен тату ұжымның әрбір мүшесінің үлесі бар, – деді филиал директоры.  

Жалпы, жолаушыларға қызмет көрсету – үлкен жауапкершілікті талап ететін жұмыс. Жасыратыны жоқ, халықпен жұмыс істеу қиын да мазасыз жұмыс, күнделікті жүздеген жолаушыға лайықты қызмет көрсету оңай емес. Сондықтан филиалда жолаушы халыққа тікелей қызмет көрсететін билет кассирлері мен жолсеріктерге талап жоғары. Әсіресе жолсеріктерді арнайы оқытып, кез келген жағдайда кәсіби шеберлік таныту, сабырлы болу, қызметтік қарым-қатынас деңгейін сақтау, тағысын тағы этикалық нормаларға бейімдейді. Кейде пойыз жолда техникалық себептермен тоқтап қалуы, электр жарығы өшуі немесе вагондағы кондиционер, салқындату жүйесі істен шығуы мүмкін. Әсіресе жаз айларында мұндай жағдайлар жолаушыларға қолайсыздық туғызады. Осындай сәттерде қызметкерлеріміз мәселені уақытылы шешіп, жолаушылардың жағдайын жасауға тырысады.  

Филиалда жұмысшы-қызметкерлер мүддесін қорғауды бірінші орынға шығарған кәсіподақ ұйымы бар. Оның төрағасы Сейтқасым Оспанов осы еңбек ұжымында талай жыл өндірісте жұмыс істеген. Сондықтан жұмысшылардың еңбек жағдайымен жақсы таныс.  

– «Солтүстік» аймақтық филиалында 1573 адам еңбек ететін болса, соның барлығы кәсіподақ мүшесі. Филиал басшылығы кәсіподақ жұмысына кедергі келтірмей, керісінше тең серіктес ретінде құрметпен қарауы нәтижесінде ұжымда жағымды ахуал қалыптасқан. Біздің кәсіподақ ұйымы – жұмысшылар, жолсеріктер, билет кассирлері, басқа да сервистік қызмет көрсететін мамандардың әлеуметтік ахуалын назарда ұстап, қолдау көрсетіп, материалдық көмек беріп, емдеу-сауықтыру орындарына жолдама бөліп, қуаныш-қызығы мен қайғысын бөлісу арқылы ұжымның сеніміне ие болып отыр, – деп өз пікірін білдірді кәсіподақ ұйымының төрағасы.