Айқындық пен ашықтыққа бетбұрыс

«ҚТЖ-Жүк тасымалы» АҚ-ның селекторлық кеңесінде сыбайлас жемқорлыққа қатысты құқықбұзушылықты бұлтартпау және алдын алу мәселелері күн тәртібінде қаралды.   

Жиынға өңірлік жүк тасымалы бөлімшелері, кадрлық және заң құрылымдық бөлімшелері, кәсіподақ ұйымдары басшыларымен қатар сыбайлас жемқорлыққа қарсы қызмет өкілдері қатысты.

«ҚТЖ-Жүк тасымалы» АҚ басшысы Қайрат Сәуірбаев филиалдардағы сыбайлас жемқорлыққа қарсы атқарылып жатқан жұмыстарға көңілі толмайтынын білдіре отырып, жемқорлық белгілеріне «нөлдік төзбеушілік», құқықтық сауаттылықты арттыру қажеттілігін атап өтті.

Жиында құрылымдық бөлімшелер басшыларының вагонның жасанды жетіспеушілігін болдырмауға, тасымалдау процесінің ашықтығын қамтамасыз етуге тікелей жауапты екені мәлім болды.

Қайрат Сәуірбаев, өңірлік темір жол бөлімшелерінде сыбайлас жемқорлық құқықбұзушылығы анықталған жағдайда қатаң шара қабылданатынын, тіпті филиал жетекшілерімен еңбек шартын бұзуға дейін баратындарын атап өтті.

Бұдан былай «ҚТЖ-Жүк тасымалы» АҚ-ның әрбір филиалында жүк жөнелтушілер мен қабылдаушылар, «Атамекен» ҰКП, «Нұр Отан» партиясы, прокуратура, Сыбайлас жемқорлыққа қарсы әрекет ету бойынша ұлттық бюро өкілдерінің қатысуымен дөңгелек үстел, семинарлар өтетін болады.

Еске сала кетсек, МҚІСҚА, Индустрия және инфрақұрылымдық даму министрлігі мен ҚТЖ басшылығы бірлесе өткізген жиында, Ұлттық компания басшысы Сауат Мыңбаев, сыбайлас жемқорлықты түп-тамырымен жою бойынша базалық жүйелі шараларды қабылдауға толық дайын екендіктерін жеткізген болатын. Оның айтуынша, жақын күндері ұлттық компанияда мемлекеттік сатып алулар жүйесі жаңаша жұмыс істеп, сыбайлас жемқорлық қатерлері мейлінше төмендейтін болады.  

Ислам ТАЛҒАТ