Вагон паркінің сақталуына шаралар
Астана вагон пайдалану депосы маневрлік және тиеу-түсіру жұмыстары кезінде вагон паркі сақталуын қамтамасыз ету мен ұйымдастыру бойынша биылға арналған шараларын бекітті.
Аталған депоның қауіпсіздік қызметі бойынша бас маманы Руслан Жангуттиновтың айтуынша, шаралар ретіне қарай алдымен барлық жауапты қызметкерлер жоспармен үш тәулік ішінде таныстырылған. Жалпы вагон шаруашылығында вагонның немесе вагон жабдықтарының ақауы анықталған әрбір жағдай мұқият зерттеледі. Зерттеу қорытындысы бойынша кінәлілер мен келтірілген шығынды көрсете отырып ВУ-25 акті толтырылады. Ай сайын Астана станциясының сұрыптау паркінде бекітілген әдіске сай вагондардың соқтығысу жылдамдығы тексеріледі. ТҚКҚ-на көрші станциялардан ақаулы вагондар келген жағдайда ДС, әскери күзет қызметі мамандарымен бірге жалпы формадағы акт толтырып, оны вагондар құрастырылған станцияға жолдау керек. Станциядан арнайы құжат бойынша кетіп бара жатқан вагондардан басқа ақаулы вагондарды жөнелтпеу қадағаланады.
Ортақ қолданыстағы емес өндірістік кәсіпорындар жолдарынан борты ашық, ақаулы, фитинг тіреуіштері сынық, стандартқа сай емес тартымдар бекітілген, басқа да кемшіліктері бар вагондар қабылдауға тыйым салынады.
- Вагон паркі сақталуын қамтамасыз ету және технологияларды орындау үшін нұсқаулықтар мен нормативтік құжаттарды оқыту бойынша техникалық сабақтар он күн сайын өткізіледі. «ҚТЖ -ЖТ» Ақ басшылығы тарапынан бізге жіберілген жеделхаттарда вагон бөлшектері мен тауарлық-материалдық құндылықтарға қатысты вагон паркінің сақталуын қамтамасыз ету бағытындағы жұмыстар төмен деңгейде делінген. Бұл 2018 жылғы көрсеткіштерде көрініс тапқан, - дейді бас маман.
Аталған қоғам басшыларының айтуынша, былтыр вагон бөлшектерінің ұрлығына қатысты 19 кемшілік анықталған. Осыған орай тасымалданатын жүк сақталуын қамтамасыз етуге бағытталған бірлескен шаралардың кешенді жоспарын жасап, соның негізінде жұмыстарды жандандыруға тапсырма берілді. Құрамдарды техникалық тексеру орындарында кіре беріс жолдан қабылдап аларда тұрақ тежегіш табандар жиынтығының болуы назарға алынады. Жұмысшылардың еңбек және технологиялық ережелерді орындауы бойынша бақылауға арналған жұмыстар күшейтілмек. Шараларды жүргізу аясында ұжымдарда ұрлау салдарының қылмыстық жауапкершілікпен аяқталатынын түсіндіру үшін ақпараттық кездесулер өткізу көзделуде. Тапсырмамен әр ауысым қызметкерін таныстырып, олардың танысқаны туралы қолтаңбасын алу қолға алынуда.
Нұрай СӘРСЕНҒАЛИ