Қазалылық вагон қараушы жаңа технологиялардың ақауды анықтауда тиімділігі зор екенін айтады
Қызылорда облысы бойынша меншікті тілші
Қазалы вагон пайдалану депосының вагон қараушысы Ербосын Нұрмағанбетовтің еңбек өтілі жиырма бес жылдан асты. Ширек ғасыр бір мекемеде жұмыс жасап келе жатқан жігіт ағасы – өз ісінің шебері атанған тәжірибелі теміржолшы.
Әкесі өмір бойы жол шаруашылығында еңбек етті, жолшы болды. Әке жолын қос ұлы жалғастырып, Ербосын вагон шаруа- шылығына бет бұрса, інісі Талғат бүгінде машинист көмекшісі. Қазалылықтар «Тәшкенбайдың қос ұлы әкелері секілді тиянақты да тындырымды азаматтар болды» дейді. Одан асқан абырой бар ма?!
Жаңақорған станциясында 1968 жылы дүниеге келген Ербосын Тәшкенбайұлы мектеп бітірген соң аудандағы училищені механизатор мамандығы бойынша оқып бітіріп, 1989 жылы әскерден келген бойы Бірлік қой шаруашылығы бірлестігінде жұмыс істепті. Тоқсаныншы жылдардан соң ауыл ша- руашылығынан маза қашып, совхоз-колхоздар тарай бастаған соң теміржолға бет бұрады. Жолаушылар вагонын жөндеу депосында бірнеше жыл еңбек еткен соң,1997 жылы осы Қазалы вагон депосына жылжымалы құрамдарды жөндеуші слесарь болып ауыса- ды да тапжылмай 25 жыл еңбек етіп келеді. Бүгінде 5-разрядты вагон қараушы-жөндеуші.
Бекетке аялдаған жылжымалы құрамдарға техникалық қызмет көрсету кезінде Ербосын секілді тәжірибелі вагон қараушылар пойызды қауіпсіздік бекетінде күтіп алып тұрып қай вагонның қалай келе жатқанын оның доңғалағының айналымына, дыбысына қарап-ақ сезеді деген сөз бар. Рас шығар, жылдар бойы қалыптасқан дағды мүмкін, сонымен қатар интуиция деген бар.