Еңбегінің жемісін көрмек
«Қазақстан теміржолшысы» газетінің тілшісі
«Жолаушылар тасымалы» АҚ ұжымы Заң департаментінің менеджері болып қызмет атқарған Алмас Құдайбергеновті құрметті демалысқа шығарып салды, деп хабарлайды Rail-news.kz.
Қызылорда өңірінің тумасы Алмас Ысқақұлы еңбек жолын автобус паркінің слесарі болып бастаған. Әскерге барып, ел алдындағы азаматтық борышын өтеп келген ол Алматыдағы Киров атындағы Қазақ ұлттық мемлекеттік университетінің заң факультетіне түсіп, оны қызыл дипломмен тәмамдайды.
Білімді маман алдымен Қызылорданың Бас прокуратурасына жолдамамен жұмысқа тұрып, кейін өзге де өңірлерде осы құқық органында жұмыс істеп, тәжірибе жинайды. Қырық жыл еңбек өтілінде құқықтық саланың жілігін шаққан майталман маманына айналады. Ал 2015 жылы ол «Қазақстан темір жолы» ұлттық компаниясының еншілес ұйымы «Жолаушылар тасымалы» АҚ-на заңгер болып, заң басқармасына орналасады. Кейін бұл басқарма департамент мәртебесіне ие болыпты.
Ал кейіпкеріміз туралы әріптестерінің айтар жылы лебізі көп. Бірі оны өз ісінің білгірі, өте сауатты әрі жауапты, кәсіби маман деп бағаласа, екіншісі оның қашанда ұстамды, сабырлы, кішіпейіл, азаматтық қасиеттерін айрықша атап өтті. Сымдай тартылған сымбаты талай жастарды жолда қалдыратын кейіпкерімізге келсек, ол зейнеткерлік жас – жаңа өмірдің бастауы екенін, енді өзіне өзі толық иелік етіп, еркіндік алған шағында алдына көптеген мақсаттар қойып және соған жетуге өмір жолын арнайтынын айтады.
