Тарлан теміржолшыға құрмет көрсетілді
Атырау облысы бойынша меншікті тілші
Атырау жүк тасымалы бөлімшесінде мемлекет және қоғам қайраткері, Атырау қаласы мен облысының Құрметті азаматы, Құрметті теміржолшы Амангелді Селбаевтың 80 жылдық мерейтойы аталып өтті.
Шараға Астана, Ақтөбе, Маңғыстаудан келген қонақтар, той иесінің замандастары мен әріптес ізбасарлары қатысты. Ғимарат фойесінде мерейгер өмірінен сыр шертетін фото көрме ұйымдастырылып, келген қонақтарға естелік кітап сыйға тартылды.
Мерейтой иесінің шәкірттері атынан сөз алған «ҚТЖ-Жүк тасымалы» ЖШС «Батыс» филиалының директоры Бөріхан Беркімбаев көпшілікті А.Селбаевтың өмірбаяны мен еңбек жолымен таныстырды. «Аманкелді Селбайұлының саналы ғұмыры отандық теміржол көлігін дамытуға, оның ішінде батыс өңірін түлетуге арналды. Ташкент темір жол инженерлері институтын бітіріп, өндірістің барлық сатысынан өткен теміржолшы Қарабатан, Ескене станцияларында кезекші, күрделі Мақат станциясының маневрлік диспетчері, Гурьев және Маңғыстау облыстарын қамтитын Гурьев темір жол бөлімшесінің аға диспетчері болып тасымалды ұйымдастыру ісіндегі кәсіби шеберлігін шыңдады. Облыс орталығындағы басты өнеркәсіп, құрылыс қуаттарын қамтитын, ең маңызды, қызмет ауқымы кең Гурьев-1 станциясын, сосын Гурьев бөлімшесін басқарған тарлан теміржолшы бөлімшенің кадрлық қорын жасақтауға да айрықша көңіл бөлді. Жергілікті жастарды темір жол институттары мен техникумдарында, арнаулы техникалық мектептерде оқытып, жұмысқа тартты. 1991 жылы Гурьев облысы өңірінен Қазақ ССР Жоғары Кеңесінің депутаты болып сайланып, өңірдегі талай әлеуметтік мәселелердің түйінін тарқатуға ықпал етті. 1996 жылы бүкіл Батыс Қазақстан темір жолының басшысы, «Қазақстан темір жолы» РМК құрылған соң Батыс аймақтағы өкілі қызметін атқарып, зейнетке шыққанша тынымсыз тер төккен аға буын өкілі, ұстазымызды мерейлі жасымен құттықтаймыз, – деген Б.Беркімбаев қазақы дәстүрмен мерейтой иесінің иығына зерлі шапан жапты.
Құттықтау рәсімін мерейгердің көзкөрген әріптестері мен үзеңгілес достары жалғастырып, тарлан теміржолшының еңбек жолындағы ерекше оқиғаларды еске алысты, өлке теміржолының дамуына сіңірген зор еңбегін атап өтті.