Қырық жыл – станция кезекшісі

Құлсары станциясында қырық жыл тапжылмай еңбек еткен станция кезекшісі Махмет Қайырлиев зейнет демалысына шықты. Әріптестері тәжірибелі теміржолшыны зор құрметпен шығарып салды.

Станция басшылығы мен кәсіподақ ұйымы ардагерді құттықтап, қазақы дәстүрмен иығына шапан жапты, ендігі жерде бейнеттің зейнетін көруіне тілектестіктерін білдірді.  

Махмет Бижанұлы осы Құлсары қаласында дүниеге келген. 1976 жылы Гурьев темір жол техникумының «Қозғалысты басқару және ұйымдастыру» факультетіне түсіп, 1980 жылы бітіріп шығады. Құлсары станциясында пойыз құрастырушы болып еңбек жолын бастайды. Бірнеше жылдан соң тәжірибе жинап станция кезекшісі болып ауысады. Міне, содан бері табаны күректей қырық жыл өтіпті...  

Станция мұнай және газ тасымалдаушы маңызды арна саналады, кен орнының дамуымен өлкедегі көлік-коммуникация кешені де дами түсті. Темір жол арқылы тасымалданатын мұнай, мұнай өнімдері және химиялық жүктер көбейді. Сол себепті мұнай өндірісінің қарқынды дамуы станцияның да әрі қарай өсуі қажеттігі талабын қойды. Соған орай 6 жолдан тұратын қосымша «Б» паркі, 8 жолдан тұратын сұрыптау паркі салынып пайдалануға берілсе, «А» паркінің жолдары 1250 метрге ұзартылды. Теңіз шикі мұнайын жылына 18 млн тонна көлемінде тасымалдауға байланысты 2007-2008 жылдары №8 разъезд бойынша мұнай өнімдері жүгі мен бос цистерналарды қабылдап-жіберу пункті ашылды.  

– Әрине, тасымалдың бұлай қарқынды өсуі ең алдымен станция кезекшісіне зор жауапкершілік жүктейді. 1989 жылы станция жаңа ғимаратқа көшкенде ең алғаш станция кезекшілігін атқару тәжірибелі маман ретінде Махмет ағамызға жүктелді. 40 жыл бойы осы станцияның ыстығына күйіп, суығына тоңған жан ретінде көп еңбек сіңірді. Бүгінгі таңда отбасында ұл-қыз тәрбиелеп, ұрпақ қызығын көріп отыр. Енді немерелерінің тәтті қылығын қызықтап, бақытты ғұмыр кешсін – дейді Құлсары станциясының бастығы міндетін атқарушы Айнабек Бисалиев.