Әулеттегі төртінші «Құрметті теміржолшы»

ҚТЖ келбеті
06.08.2024, 10:33
Суретті түсірген Александр ЖАБЧУК
Сұлугүл Бакесова

«Қазақстан теміржолшысы» газетінің тілшісі

«Жолаушылар тасымалы» АҚ-на қарасты «Солтүстік» филиалының жолсерігі Амангелді Қожабаев жолаушыларға адал да мінсіз қызмет етіп, еңбекте табысты нәтижелерге қол жеткізіп, жолаушылар пойыздарының қозғалыс қауіпсіздігін қамтамасыз етуге атсалысқаны үшін «Құрметті теміржолшы» белгісімен марапатталды.

«Әсем Бурабай баурайында орналасқан Щучье қаласында дүниеге келдім. Теміржолшы болу бала кезгі арманым еді, мектепте оқып жүргенде «Жас теміржолшы» деген үйірме болатын. Осы үйірмеге төрт жыл қатыстым. Үлкен адамдар құсап, форма киіп, балалар темір жолына жұмысқа баратынбыз. Мектепті бітірген бойда нағыз теміржолшы боламын деген мақсатымды жүзеге асыруға бел будым. Енді ше? Бұл мамандық бізге қанмен берілген десек те болады. Атам өмірін теміржолға арнап өткен «Құрметті теміржолшы» еді. Ағатайым да ревизор болып жұмыс істеп, туыс апатайым да осы салаға мол еңбек сіңірді. Олар да құрметті теміржолшылар. Осылайша, теміржолшы әулетінің өкілі бола отырып, менің де теміржолшы болмасқа қақым жоқ еді. Ал бүгін ердің жасы елуді еңсергелі отырған шақта мен де әулетіміздің абыройын арттырып, теміржолшы үшін ең мәртебелі атақ – «Құрметті теміржолшы» белгісінің иегері атандым. Бұл менің отыз жылғы тынымсыз адал еңбегіме берілген әділ баға деп білемін», – деп сыр бөлісті су жаңа Құрметті теміржолшы Амангелді Естайұлы.  

Екі жоғары оқу орнын бітірген кейіпкеріміз жолсерік мамандығын өзгертуді ойлаған емес. Дипломды маман ретінде еңбек жолын жолсеріктен бастаған ол әлі сол мамандықты абыроймен атқарып келеді. Бүгінде Астана – Алматы оның тұрақты бағыты. Бір кездері шекара ашық болғанда, Санкт-Петербор, Киев, Достық арқылы Үрімші бағыттарындағы жолаушылар пойыздарында жолсерік болғанын айтады. Үнемі жол үстінде, сан түрлі адамдарды жолықтырып, олармен тікелей байланыста жұмыс істейтін жолсерік жауапкершілік жүгі ауыр болса да, өз кәсібін құлай сүйгенін айтады.  

«Әрине адамның әртүрлі мінездісі, томаға тұйығы, сабырлысы, қабағы қатулысы, ақ жарқыны кездесіп жатады. Алайда, олардың бабын тауып, жібектей болып, жібін білдірмей, діттеген жеріне дейін аман-есен жеткізу біздің міндетіміз. Осыншама жыл қызметімде түрлі адамдарды жолықтырдым. Жол үстінде сырқаттанып, жәрдемге жүгініп жататындар да болады. Жолаушылардың керегіне жарап, қолғабысымыз тиіп, алғысын алсақ, марқайып қаламыз. Өкпелеп жатқандардың шағымын тыңдап, қолымыздан келер дүние болса, түзетуге тырысамыз. Бірақ, өкпереніштен гөрі алғыс айтушылар көп. Бұл да болса, біздің маңдай теріміздің ақталғаны», – дейді Амангелді.  

Ол ҚТЖ компаниясында өтіп жататын әртүрлі оқытулардың, мәселен, стреске төтеп беру, дау-кикілжіңді бейбіт жолмен шешу, алғашқы медициналық көмек, техникалық қауіпсіздік, төтенше жағдайда оңтайлы шешім қабылдау сынды тағысын тағы білім-ілімнің жұмыс барысында көп көмегі тиетінін айтады. Кейіпкеріміз бос уақытында табиғат аясында тыныстап, балық аулап, қыста шаңғы тебуді ұнатады екен.  

 

Жаңалықтар
08.07.2025
ҚТЖ басшылығы Бейжіңде өткен ХТЖО-ның XII конгресінде бірқатар стратегиялық кездесулер өткізді
Қауіпсіздік
08.07.2025
Қарағанды – Ағадыр бағытында машинист шұғыл тежегіш қолдануға мәжбүр болды
Аймақтар
08.07.2025
Бейнеудегі машинистердің демалыс үйі жаңа кейіпке енді
Әлемде
08.07.2025
Әзірбайжан темір жолдары жазғы кестеге көшеді
Әлемде
08.07.2025
Тәжікстан Қытай–Қырғызстан–Өзбекстан теміржолы жобасына қосылғысы келеді
Әлемде
08.07.2025
Қытайда панда бейнесіндегі монорельс пойызы таныстырылды
Жолаушылар тасымалы
07.07.2025
ҚТЖ Алматы-Саратов бағытына жаңа вагондар шығарды
Жаңалықтар
06.07.2025
КТЖ басшылығы «Нұрлы жол» вокзал кешенінің жұмысымен танысты
Жаңалықтар
04.07.2025
ҚТЖ жол жөндеу техникасын жаңартуда
Жүк тасымалы
04.07.2025
Жаңа маусымға – жаңа вагондармен
Аймақтар
04.07.2025
Депутаттар контейнерлік аэрохаб жұмысымен танысты
Аймақтар
04.07.2025
Абай әлеміне саяхат
Цифрландыру
04.07.2025
Цифрлық технология: Зияткерлік білім сайысы
Аймақтар
04.07.2025
Құлсары дистанциясында жол жөндеу қарқын алды
Аймақтар
04.07.2025
Болашақ станциясы арқылы Түрікменстанмен жүк алмасу тұрақты жалғасуда
Жаңалықтар
04.07.2025
Қазақ-моңғол қатынасы сөз болды
Жаңалықтар / Мұрағат
04.07.2025
Қазақстан теміржолшысы газеті, №51 04 шілде 2025 жыл
Жаңалықтар
03.07.2025
Мемлекет басшысы Көлік министрі Нұрлан Сауранбаевты қабылдады
Қауіпсіздік
03.07.2025
Өрт сөндірудің заманауи әдістері талқыланды
Жаңалықтар
03.07.2025
ҚТЖ Басқарма төрағасы тағайындалды