Еңбек адамы: Вагон қараушыға құрмет
"Қазақстан теміржолшысы" газетінің Жамбыл облысындағы меншікті тілшісі
Жаңа жылдың алғашқы аптасында Жамбыл облысы Т.Рысқұлов ауданының әкімі Ернар Есіркепов «Жұмысшы мамандықтары жылына» орай ВЧД-27 Жамбыл вагон пайдалану депосының Түрксіб станциясындағы вагондарға техникалық қызмет көрсету пунктінің вагон қараушысы Сәкен Көкжаловтың шаңырағына барып, еңбек адамына құрмет көрсетті.
Аудан басшысы түрлі саладағы жұмысшылардың адал еңбегі ауданның экономикалық дамуы жолындағы басты көрсеткіш болып табылатынын тілге тиек етіп, ерен еңбек үлгісі дерлік сыйлы маман иелері қатарында теміржолшылардың орны бөлек екенін ерекше атап өтті.
Сәкен Тасыбайұлы Луговой ауылында тұрады. Теміржолды жағалай қоныстанған елді мекеннің тұрғындарының басым көпшілігі өмірін шойын жолмен байланыстырғаны белгілі. Ауыл жастары трендтегі кәсіпті емес, тұрақты табыс көзі болатын қолжетімді мамандықтарды таңдауы – ауданда темржолшылар әулетінің бірнеше буыны өсіп шығуына септік етті.
Вагон шебері Сәкен Көкжаловтың теміржол саласында табан аудармай жұмыс істеп келе жатқанына 41 жыл толыпты. Адал еңбегіне сай елге абыройлы, айналасына сыйлы. «Құрметті теміржолшы» төсбелгісінің иегері. Ол Мемлекет басшысының 2025 жылды «Жұмысшы мамандықтарының жылы» деп жариялауы – еңбек адамдарының қоғамдағы рөлін арттырып, олардың кәсібіне деген құрметті биікке көтереді деген сенімде.
Айта кету керек, ВЧД-27 Жамбыл вагон пайдалану депосының вагондарға техникалық қызмет көрсету пункттері Сарышаған, Шу, Түрксіб, Тараз, Қаратау, Жаңатас станцияларында орналасқан. Техникалық қызмет көрсету пункттеріндегі вагоншыларға 5 нұсқаушы арқылы тиісті нұсқаулықтар беріліп отырады.