Сауатты әрекет сауапты іске бастады

2025 жылдың 10-шы ақпаны. Бұл күн теміржолшы Бауыржан үшін де, жас жігіт Анатолий үшін де естен кетпес ауыр күн болды. Бірі адам өмірін құтқарды, бірі өлім аузынан қалды.

Атбасар жол дистанциясының қатардағы жолшысы Бауыржан Жаманбаев сол күні әдеттегідей түстік ішіп болғасын сағат 13.45-те ағымдық жұмыстарды орындауға дайындық жасау үшін әріптестерімен бірге тысқа шығады. Осы кезде Бауыржан Астана станциясына бағыт алған жүк құрамының жұп жолға кіріп келе жатқанын және оның өтіп кетуін күтіп тұрған бөгде адамды байқап қалады. Бұл кезде көрші жолмен маневрлік құрам да келе жатқан-ды. Бір кезде тарс еткен дауыс шығады, жол монтері белгі беріп маневрлік құрамды тоқтатуға жүгіреді, бірден локомотив адам қағып кетті деп ойлайды. Шынында да, пойыз қағып, адамның аяғын ауыр техника мыжып өткен.  

«Мен жүгіріп барғанда жас жігіт етпетінен жатыр екен, жылжымалы құрам астында қалған аяғы терісіне жабысып, киімімен бірге салбырап тұрды. Жігіттің «көмектесіңдер...» деген жан даусы шықты. Мен дереу екі қолтығынан демеп шығара бастадым. Осы кезде әріптестерім, пойыз құрастырушы мен машинист те жүгіріп келді. Жалма-жан жігіттер жан-жақтан көтеріп, жапа шегушіні табельдік кеңсеге апардық. Бірден сол жердегі медициналық қобдишадан резеңке алып, қан көп жоғалтпау үшін тізеден қатты етіп таңып тастадық. Жедел жәрдем де жылдам келді. Жігітті зембілге салып, жолдың ар жағында тұрған жедел жәрдем көлігіне апарып салуға көмектестік», – дейді Бауыржан Жаманбаев.  

Өлім аузынан қалған жігіт Анатолий Свяхин 21 жаста екен. Балалар үйінде тәрбиеленіпті. Қазіргі жағдайы тұрақты, амансау, бірақ, өкінішке орай, бір аяғынан айырылып, мүгедек болып қалды. Жас жігіт рұқсатсыз жерден өтіп, жол ережесін бұзғанына, салдарында осындай жағдайға тап болғанына қатты өкініп отыр. Бірақ, опық жегізген өкініш орнын еш нәрсемен толтыра алмасы анық. Бәлкім, бұл жағдай басқаларға сабақ болар...  

Ал қауіпті аймақта қырағылық танытып, жедел де сауатты әрекет ете отырып зардап шегушіге көмекке ұмтылған Бауыржан Сейітахметұлының бұл ісі ерлікке пара-пар. Әріптестері оны кәсібінің маманы, адамгершілігі мол жан деп сипаттайды. Төрт баланың әкесі отбасының жалғыз асыраушысы, әйелі бала-шағасы мен қарт ата-атасының күтімін жасап үйде отыр. Ауылда жұмыс жоқтықтан Атбасар қаласына көшіп келіп, несиемен шағын үй сатып алған жолшы жігіттің тағдырын теміржолмен байланыстырғанына биыл сегіз жыл.