Кәсібінен береке тапқан жан

Құрметті теміржолшы Жетпісбай Шаранов Түрксібтің түп қазығы саналатын Жарманың тумасы. Яғни, теміржолшы болмасқа хақысы жоқ, тағдыр әу баста маңдайына жазған кәсібі сынды...

Техникалық училищені СОБ электромеханигі мамандығы бойынша бітіріп, екі жыл әскер қатарында борышын өтеп, Жарма станциясындағы белгі беру-байланыс дистанциясына СОБ электромонтері болып жұмысқа тұрғанда ол 22 жастағы жас жігіт болатын. Содан бері міне, 41 жыл көзді ашып-жұмғанша зулап өте шығыпты. 14 маусым күні өз саласы бойынша кәсібиліктің шыңына шығып, ортасына мойындалған маман, «Құрметті теміржолшы» белгісінің иегері Жетпісбай Тұрарбекұлы 63 жасқа толды. Қырық жылғы бейнеттің зейнетін көретін күн де туды деген сөз.  

– Жарма станциясында халықтың жартысы теміржолшылар болатын. Сондықтан станцияда теміржол мектебі, балабақшасы, ауруханасы, клуб, стадион бәрі теміржолға тиесілі болды. Әке-шешеміз болса болмаса теміржолшылар. Сондықтан, біз мектеп бітіргенде алдымызда қайда барам, кім болам деген сауал туындаған жоқ, – дейді Жетпісбай Тұрарбекұлы.  

Жарма дистанциясында СОБ электромонтері болып төрт жыл жұмыс істеп, тәжірибе жинаған жас маман одан әрі СОБ электромеханигі лауазымын үш жыл атқарады. Сосын Семей сигнал беру және баланыс дистанциясына ауысып, ДЦ қосынында ауысымдық электромеханик, ПОНАБ және радио, байланыс, СОБ құрылғыларының үзіліссіз жұмысын қамтамасыз ету бойынша бірінші дәрежелі инженер, сосын Семей НЖС-6 өндірістік бөлімінің жетекші инженері болып 2012 жылға дейін қызмет атқарды. Өндірістен қол үзбей Алматы теміржол академиясын бітіріп жоғары білім алды.  

Одан әрі кәсібіне жауапты да сауатты маман Астанаға ауысып, Ұлттық компанияның «Бас байланыс басқарма орталығы» филиалына жетекші инженер болып жұмысқа кіріседі. Сегіз жыл осы қызметтің бүге-шігесін меңгеріп, әріптестері алдында үлкен абыройға ие болды. Ал 2020 жылдан бүгінгі күнге дейін «Автоматика, телемеханика және байланыс орталығында» ЖАТС құрылғыларының жұмысын үзіліссіз бақылауды қамтамасыз ету бөлімінде жетекші инженер болып қызмет атқаруда.  

– Теміржол маған жауапкершілікті, мақсатшыл болуды, ұқыптылықты, адалдықты, адамдармен жақсы қарым-қатынас орнатуды және ұйымдастырушылық қасиеттерді үйретті. Ұлттық компанияда еңбек етіп, өзімнің білімім мен тәжірибемді ғана емес, барлық мүмкіндігім мен қабілетімді сарқа пайдалана білгеніме қуанамын, – дейді кейіпкеріміз.  

Сүйікті кәсібінен ғана емес, отбасынан да бақыт пен береке тапқан жан жарасымды жанұя құрып, жары екеуі екі ұл өсіріп жеткізіп, бүгінде бір топ немереге ата-әже атанып отыр.