Әр секунд қауіп-қатерге толы
Ақтөбе облысы бойынша меншікті тілші
Теміржолшы-электромонтер Самат Тіленғұсовтың әр күні қауіпке толы. «Никельтау-Қандыағаш» учаскесінде пойыздар қозғалысының қауіпсіздігін қамтамасыз етуге жауапты маман 10 мың вольттық электр желісімен жұмыс істейді.
Ақтөбе магистральдық желі бөлімшесінің Никельтау – Қандыағаш учаскесінің электромонтері Самат Тұрғалиұлы – дистанциядағы тәжірибелі мамандардың бірі.
«Жоғары кернеулі тоқпен жұмыс істейміз. 10 мың вольт. Әр секунд қауіп-қатерге толы. Қателесуге хақың жоқ, титтей қатеге өміріңмен жауап бересің. Күн сайын осы қауіппен бетпе-бет келеміз. Әр құрылғымен жұмыс істеудің бекітілген тәртібі бар. Рұқсатнама алынады. Онда қандай кернеулі қуат көзімен жұмыс жасауға мүмкіндік берілгендігі көрсетілген. Біздер, электромонтерлер, тәуекелге толы әр күннің сәтімен өткенін тілейміз», – деді кейіпкеріміз.
Электромонтер биылғы көктем кезіндегі жұмыстары ерекше қиын болғанын айтады. Көктайғақ кезінде желіні тазалау жұмыстарына белсене қатысқан. Сонымен қатар Жазық станциясындағы трансформаторлық қосалқы станцияны су басудан қорғап қалған. Ал қыстың күндері желіге мұз қататын кездер аз емес. Бұл кезде де жұмыс тоқтаусыз жүреді. Дер кезінде желіге қатқан мұзды қағып отырмаса, сым үзіліп кетуі мүмкін.
«Әрине, ондай жұмыстар көп. Көктем мен қыста уақытпен санаспайтын кездер болады. Қажет болса түнде де шығуға тура келеді. Негізгі міндетіміз – күні-түні тынымсыз ағылып жатқан пойыздар қозғалысын тоқтатпау, қозғалыс қауіпсіздігін қамтамасыз ету», – дейді кейіпкеріміз.
Биыл 60 жасқа толатын электромонтердің бос уақытындағы ермегі екі баласынан тараған бес немересінің тәрбиесі екен.