Теміржолшының сергектігі – жүздеген жолаушының амандығы

Адам бойындағы қырағылық қасиеті оның еңбек тәжірибесіне байланысты болмаса керек. Бұл ой теміржолдағы жұмысын екінші жыл жалғастырып жатқан Дәурен Өтемісовтің іс-әрекетінен кейін туындады.

Ол 2024 жылдың 21 желтоқсанында кешкілік вагон арбашығының бүйір рамасынан көзге көрінер-көрінбес қылдай жарықшақты көріп қалып, болуы ықтимал апаттың алдын алды. Ал Дәурен темір жолдағы еңбек жолын сол жылдың басында ғана бастаған. 35 жастағы жігіттің кейбір замандастары бұл кезде тәжірибелі теміржолшы атанып, қанжығаларын түрлі марапаттармен майлап та үлгерді деуге болады. Бірақ Дәурен қазіргі беталысының дұрыс екенін пойыздарға техникалық қызмет көрсету барысында арбашық бүйір рамасындағы жарықшақты анықтау арқылы дәлелдеп берді.  

«Темір жолға келмес бұрын түрлі жұмыстар атқардым. Үйлі-баранды болдым. Балаларым дүниеге келді. Осы кезде тұрақты бір жерге жұмысқа тұруым керек деген ой келіп, теміржол саласын таңдадым. Колледжді бітіріп, Астана вагон пайдалану депосына орналастым. Қазір 5-ші разрядты вагон қараушымын. Жұмыс кестесі, атқаратын қызметім – бәрі көңілімнен шығады. Жұмыскер еңбегі ұжымдық шартпен қорғалған. Тіпті балаларымыз да ұмыт қалмай, мерекелерде сыйлықтарын алып тұрады. Театр, циркке барып, лагерьде демалу мүмкіндігі бар. Мен де еңбек демалысымда шипажайға барып, денсаулығымды нығайтып келе аламын», – дейді кейіпкеріміз.  

Оның айтуынша, темір жолдағы темірдей тәртіп – оның жанына жағатын дүние екен. Мәселен, техникалық сабақтарды жібермей, тұрақты қатысып тұруының арқасында бір жыл ішінде күрделі ақауды анықтай алатын дәрежеге жетіп отыр.  

«Әр ауысымда 10-нан 40-45 пойызға дейін техникалық қызмет көрсетеміз. Балғамен ұрып, шыққан дауысты тыңдаймыз. Ең бастысы, мұқият зейін қойып тыңдау, қарау, қырағылық таныту. Ал мұның бәрі түптеп келгенде өндірістік шебердің дәрісін зер қойып тыңдап, білмегеніңді сұрап, өз ісіңнің білгірі болуға ұмтылудың нәтижесі», – деп түйіндейді сөзін Дәурен Өтемісов.