Салауатты өмірді серік еткен отбасы
"Қазақстан теміржолшысы" газетінің Жамбыл облысындағы меншікті тілшісі
Жалпы теміржол саласында жұмыс істейтіндер дәлдік пен есепті біледі, тек техниканың ғана тілін түсінеді деп ойласаңыз, қателесесіз. Сала мамандарының көпшілігі шапшаң ойлау қабілетіне ие, рухани жандүниесі бай, өнерге жақын. Ануар Ақылбеков – сондай сегіз қырлы, бір сырлы азаматтың бірі.
Ол – Жамбыл локомотив пайдалану депосында он бір жылдан бері электровоз машинисі. Ал осы депода тасымалдау құжаттарын өңдеу жөніндегі оператор болып жұмыс істейтін Ануардың жұбайы Жансая Дәрменқұлова да өнерден құралақан емес. Өз міндетіне жауапты, отбасындағы тірлігін де шашау шығармай, шаңырақтың шырайын кіргізіп отыр.
Салауатты өмір салтын ұстанған, сергектікті серік еткен отбасы жақында теміржолшылар арасында өткен «Әкем, анам және мен» атты республикалық байқаудан 2-орынды олжалап оралды. Қазақстанның барлық аймағынан 22 команда қатысқан жарыста жүлдегер атанып, 120 мың теңгенің сертификатын жеңіп алды.
– Байқаудың ережесі бойынша жарысқа бір ғана балаңызбен қатыса аласыз. Ұлым Инсар биыл 7-сыныпқа көшті. Қазіргі жеткіншектер жаңа технологияның тілін бізден артық меңгерген ғой. Шапшаң ойлайды, тез шешім қабылдай алады. Жарыс талаптарына сай берілген тапсырмаларды белгілі бір уақытта орындап бітуіңіз керек. Ерте аяқтасаңыз, тіпті жақсы. Ұпай жағынан қарсыластарыңнан алда тұрғаныңызға сенімді боласыз. Инсар сол жағынан бізге көп көмектесті. Жалпы осындай байқаулар баланың бойына отбасылық құндылықтар деген ұғымды сіңіре түседі. Сондықтан дәстүрлі түрде өткізіліп тұратын жарыс жалғасын таба берсе деп тілейміз, – дейді Ануар Ақылбеков.