Жолаушының алғысына бөленген кассир
Ақтөбе облысы бойынша меншікті тілші
Нұржамал Райымханова – теміржол саласына 35 жылын арнаған кәсіби маман. Ол Ақтөбе теміржол вокзалында билет кассирі болып еңбек етеді. Өмірін жолаушы қызметіне арнаған ол – өз ісіне берілген, теміржолшылардың адал еңбегін айқындайтын кейіпкер.
Шалқар қаласында дүниеге келген Нұржамал Амангелдіқызының (ортада) темір жолға деген сүйіспеншілігі бала кезінен қалыптасыпты. «Пойыздың дауысына елеңдеп, форма кигендерге қызыға қарайтынмын. Сол кезде-ақ болашақта теміржолшы боламын деп өзіме уәде бердім» дейді ол.
Мектепті бітірген соң, 1986-1990 жылдары Ақтөбе теміржол техникумында білім алады. Дипломдық практика кезінде-ақ өз қабілетін дәлелдеп, көзге түскен қызды Ақтөбе вокзалы бірден жұмысқа қабылдайды. Содан бері осы ұжымда 35 жылдан бері табан аудармай еңбек етіп келеді. Нұржамал Райымханова еңбек жолын бастаған жылдары билет қағаздарын қолмен есептеп, арнайы инемен тесу арқылы рәсімдейтін.
«Ол кезде бәрін қолмен жасайтынбыз: тарифті есептеп, номерді жазып, компостермен билетке белгі соғамыз. Қазір бәрі электронды. Бір билетті рәсімдеуге бұрын бес минут кетсе, қазір санаулы секунд жеткілікті», – дейді тәжірибелі кассир.
Заманауи технологиялардың енуіне қарамастан, ол жолаушылармен жүзбе-жүз кездесіп, қызмет көрсеткенді жақсы көреді. Бүгінде ағылшын тілін меңгеріп, шетелдік жолаушыларға да қызмет көрсете алады.
Кейіпкерімізді ақтөбеліктер жақсы таниды. Көпшілігі жүзі жылы, сыпайы қызмет көрсететін кішіпейіл кассирден билет алуға тырысады. Әріптестері де Нұржамалдың адамгершілігі мен еңбексүйгіштігін ерекше атап өтеді.
«Нұржамалмен 1991 жылдан бері бірге жұмыс істейміз. Әрдайым қамқор, ақжүрек, көмегін аямайтын жан. Жолаушылар алғыс айтып жүретін үлгілі қызметкер», – дейді әріптесі Меруерт Тілеулина.
2024 жылы – «Адал еңбегі үшін» медалімен, 2023 жылы – «Жолаушылар тасымалы» АҚның 25 жылдығына арналған мерейтойлық медальмен марапатталған кейіпкеріміз көп балалы отбасында тәрбиеленгендіктен, атаанасынан еңбекқорлық пен мейірімділікті бойына сіңіріп өскенін айтады.