Аралдың ару қызы
«Қазақстан теміржолшысы» газетінің тілшісі
Жастар форумында Арал теңізі станциясы вокзалының кезекшісі Зәмзәгүл Қарақұлова ерекше белсенділігімен ғана емес, өнерімен де көзге түсті.
«Өңірлер бет-бейнесі» байқауында Қызылорда командасы өнер көрсеткенде сахнаға жарқ етіп шыққан Зәмзәгүлдің әні көрерменді бірден баурап алды. Сахнада өзін ұстауы, биі мен сымбаты оны нағыз жұлдыз етті. Бірақ Зәмзәгүл бала кезден әнші болуды емес, теміржол саласында қызмет етуді армандапты. Алматы қаласындағы Қазақ қатынас жолдары университетін бітірген.
– Алғаш еңбек жолымды 2012 жылы Астанада, Вокзал-сервисте жолсерік болып бастадым. 2017 жылы Арал теңізі вокзалына вокзал кезекшісі болып қызмет ауыстырдым. Көпшілікпен жұмыс істейтін болған соң жауапкершілік жоғары. Қиындығы да жоқ емес. Бірақ сонысымен қызық. Өзімнің жұмысымды жақсы көремін. Өзімді Қазақ темір жолының бір бөлшегімін деп білемін, – дейді Зәмзәгүл.
Форумның «Теміржол білгірлері» интеллектуалдық ойынында теміржолшы арудың әншілік өнерінен бөлек ақындық қыры да танылды. Жұмысына ұқыпты, ортасына сыйлы, отбасында аяулы жар. Қоғамдық жұмыстарға белсене араласатын кейіпкеріміз волонтерлік қырымен де танылып, бұл ісін ҚТЖ-да да көрсетіп жүр. Сол еңбегі үшін ол форумда «ҚТЖ» ҰК» АҚ Басқарма төрағасы Талғат Алдыбергеновтің қолынан «Корпоративтік волонтер» дипломын алды.