Еңбекпен өрілген өмір
Қазақ темір жолы саласында адал еңбегімен, табандылығымен және кәсіби шеберлігімен танылған жандар аз емес. Солардың бірі – Қалдығарина Алтынай Сәбитқызы.
Алтынай Сәбитқызы еңбек жолын 1981 жылы Гурьев белгі беру және байланыс дистанциясында электромонтер болып бастап, теміржол саласына саналы ғұмырының 41 жылын арнады. 1988 жылы Мақат локомотив жөндеу депосына ауысты. Ұзақ жылғы тынымсыз еңбегінің арқасында ол өз ісінің білікті маманы ғана емес, талай жас маманға бағыт-бағдар беріп, тәлім-тәрбие үйреткен ұстазға айналды.
Атап өтерлігі, Қалдығариндер династиясы – теміржол саласында ерекше орны бар әулет. Бұл әулеттің төрт буынды құрайтын өкілдері теміржол саласында үздіксіз еңбек етіп келеді, жалпы еңбек өтілі – 323 жыл. Мұндай еңбек жолы – нағыз әулеттік дәстүр мен кәсіби сабақтастықтың айқын көрінісі.
Әулет тарихында ерекше атап өтерлік оқиға – Алтынай Сәбитқызының әкесі Сәбит Төлегенұлының ерлігі. Ол жұмыс барысында Батыс Қазақстан темір жолында үлкен қауіптің алдын алып, келе жатқан жүк және жолаушылар пойызын апаттан сақтап қалған. Осы батылдығы мен жоғары жауапкершілігі үшін Қалдығарин Сәбит кезінде Мәскеу қаласына арнайы шақыртылып, «Құрметті теміржолшы» белгісімен марапатталды. Әке жолын абыроймен жалғаған Алтынай Сәбитқызының адал еңбегі елеусіз қалмай, жоғары марапаттарға ие болды. Ол – «Еңбек ардагері» медалінің иесі.
Темір жол – тәртіп пен төзімділікті, жауапкершілік пен адалдықты талап ететін сала. Осы қасиеттердің барлығын бойына сіңірген Қалдығариндер әулеті – кейінгі ұрпаққа үлгі боларлық өнеге. Алтынай Сәбитқызының саналы ғұмыры мен мағыналы еңбегі Қазақстан темір жолы тарихындағы жарқын беттердің бірі болып қала бермек.
Көп жыл «Қамқор Локомотив» ЖШС ұжымында абыройлы еңбек еткен Алтынай Сәбитқызы бүгінде зейнет жасына толып отыр. Әріптестері оны зор құрметпен еңбек демалысына шығарып сала отырып, Алтынай Сәбитқызына көп жылғы еңбегінің зейнетін көріп, ел аралап, қайғысыз ұзақ өмір сүруге тілектестіктерін білдірді.
Сәуле БАКИРОВА,
«Қамқор Локомотив» ЖШС
кадр саясаты бөлімінің бас менеджері