ҚТЖ – жүлделер көшбасшысы

Астанада көлік және логистика саласындағы Еуразиялық «Magistral Awards-2025» сыйлығының марапаттау рәсімі биыл 4-рет ұйымдастырылды. Іс-шара барысында Еуразияның көлік каркасын дамыту, кәсіби шеберлік пен салалық басқару, үздік салалық жобалар, цифрлық логистика, кадрлық әлеуетті дамыту, көлік ғылымы мен білім беру бағыттары бойынша елеулі жобаларды жүзеге асырып, көлік қызметтерінің сапасын арттырған компаниялар мен мамандар марапатталды.

«ҚТЖ» ҰК» АҚ Басқарма төрағасының орынбасары Марат Шәкенов іс-шараның халықаралық деңгейде мәртебесі жылдан жылға артып келе жатқанын атап өтті. Байқаудың көлік саласында беделінің артқаны сонша, кәсіби ортада қатысушылардың жоғары мәртебесі мен халықаралық географиясының кең ауқымы үшін ол «Көлік Оскары» деп аталады. 2025 жылы сыйлықта дәстүрлі салалық бағыттармен қатар Еуразияның көлік жүйесінің тұрақты дамуының негізгі факторлары ретінде экологиялық жауапкершілікке, ұрпақтар сабақтастығына және жастар бастамаларына ерекше назар аударылды. Байқауды ұйымдастыру комитетінің мәліметінше, 2025 жылы ТМД, ЕАЭО, Қытай, Біріккен Араб Әмірліктері және басқа мемлекеттердің компаниялары мен сарапшыларынан 100-ден астам өтінім келіп түскен. Жеңімпаздар мен дипломанттар инфрақұрылымдық және цифрлық шешімдерден бастап кадрлық және қоғамдық бастамаларға дейінгі 21 номинация бойынша анықталды. Соның 13 номинациясы бойынша ҚТЖ мен оның еншілес ұйымдарының өкілдері және кәсіпорындары марапаттарға ие болды. Осылайша, теміржол, әуе және автомобиль көлігі салаларының, сондай-ақ көлік-логистикалық орталықтар мен ұйымдардың өкілдерінің басын біріктірген жүлдеде жеңістің басым бөлігін теміржол саласының өкілдері алды.  

Атап айтқанда, «Транспорт профи» номинациясында «ҚТЖ» ҰК» АҚ жүктермен коммерциялық жұмыс департаментінің менеджері Елена Сатыбалдина, «KTZ Express» АҚ Бас директорының логистика жөніндегі орынбасары Айбек Қапар, Магистральдық желі дирекциясының пайдалану көрсеткіштерін жоспарлау департаментінің директоры Ләззәт Мұсабекова дипломдармен марапатталды. «Көліктік басқару шеберлігі» номинациясында «KTZ Express» АҚ Бас директорының операциялық қамтамасыз ету жөніндегі орынбасары Қуаныш Жақсыбек, «Көліктің алтын қоры» номинациясында «ҚТЖ» ҰК» АҚ Әлеуметтік саясат департаментінің «Ардагерлер – теміржол көлігінің алтын қоры» жобасы дипломдар алды. Сонымен қатар «Жылдың үздік жобасы» номинациясында «Кедентранссервис» АҚ-ның «ZHETYSU терминалын салу және іске қосу» жобасы және «Жолаушылар тасымалы» АҚның «Jibek Joly» және «Keruen Express» туристік пойыздары жобасы дипломға ие болды. Бұған қоса «Кедентранссервис» АҚ мен Xi’an Free Trade Port Construction and Operation Co., Ltd (ҚХР) серіктестікте «Көлік саласының стратегиялық серіктесі» номинациясының статуэткасын еншіледі.  

«Цифрлық логистика көшбасшысы» номинациясында «KTZ Express» АҚ «Бірыңғай цифрлық терезе» платформасы үшін аталған байқаудың басты марапаты – «Magistral Awards» статуэткасын алды. «Көлік кешеніндегі үздік HR-бастамалар» аталымында «ҚТЖ» ҰК» АҚ Адами ресурстарды басқару департаменті «ҚТЖ: мотивацияның жаңа дәуірі» жобасы арқылы статуэткаға ие болса, осы аталымның дипломы «Әлеуметтік талдау» жобасы үшін «ҚТЖ» ҰК» АҚ Әлеуметтік саясат департаментіне берілді. «Көлік ғылымын дамытқаны үшін» номинациясында Маңғыстау магистральдық желі бөлімшесі директорының бірінші орынбасары Ерлан Бүркітов диплом алды. «Тиімді көлік шешімдерін жасағаны үшін» аталымы бойынша «ҚТЖ» ҰК» АҚ Техникалық саясат департаменті және техникалық орталығы, «Салалық дәстүрлерге адалдығы үшін» номинациясымен «ҚТЖ» ҰК» АҚ Интеграция және халықаралық ынтымақтастық департаменті тобының жетекшісі Айман Ибраева мен Қарағанды ЖТ бөлімшесі тасымалдауды ұйымдастыру бөлімінің жетекші инженері Рахат Жаруллина дипломдармен марапатталды.  

«Көліктегі үздік жастар бастамасы» номинациясында «ҚТЖ-100 жас есім» жас қызметкерлерді дамыту бағдарламасы үшін «ҚТЖ» ҰК» АҚ Әлеуметтік саясат департаменті статуэткаға және «Корпоративтік волонтерлік мектебі» жобасы үшін дипломға ие болды. Осы аталым бойынша тағы бір диплом «ҚТЖ» ҰК» АҚ инженер-технологы Жұлдызай Байдүйге берілді. «Құрметті әулет» номинациясы бойынша «ҚТЖ» ҰК» АҚ династиясы – Бурлиновтер әулеті статуэтка алса, Сайрамбаевтар және Левковтар әулеттері дипломмен марапатталды. Ал «Логистикадағы экологиялық жауапкершілік көшбасшысы» номинациясында «Бірге Таза Қазақстан» жобасы үшін тағы да «ҚТЖ» ҰК» АҚ Әлеуметтік саясат департаменті дипломға лайықты деп атап өтілді.  

– «Көлік кешеніндегі үздік HR-бастамалар» номинациясына «ҚТЖ мотивацияның жаңа дәуірі» жобасын ұсынып, биыл да жеңімпаз болдық. Жоба – қызметкерлер мен олардың отбасыларының өмір сүру сапасын арттыруға және бір мезгілде тұрақты және тиімді жұмыс ортасын қалыптастыруға бағытталған табысты HR-бастаманың жарқын мысалы, бұл ретте мұндай ауқымды және маңызды жоба қандай да бір ақша қаражатын тартпай-ақ іске асырылды. Жобаның негізгі мақсаты – шығындарды үнемдеу ғана емес, сонымен қатар теміржолшылар мен олардың отбасыларының өмір сүру сапасын арттыру. Жоба аясындағы KTZ Primezone корпоративтік артықшылықтар бағдарламасы – теміржол кешенінің қызметкерлері мен олардың отбасылары үшін ең жақсы ұсыныстарды біріктіретін заманауи цифрлық платформа. 2025 жылдың 8 айының қорытындысы бойынша платформада компанияның 34 466 қызметкері тіркелді, – дейді жоба жетекшісі және «ҚТЖ» ҰК» АҚ Адами ресурстарды басқару департаментінің бас менеджері Саян Сыздықов.  

Жиында көлік вице-министрі Жәнібек Тайжанов көлік пен логистиканы дамыту елдің тұрақты әлеуметтік-экономикалық дамуын қамтамасыз етіп, аумақтық байланысты нығайтатынын және халықаралық сауда-экономикалық қатынасты кеңейтуге үлкен мүмкіндік беретінін, көлік министрлігі көлік саласын дамытуға бағытталған бастамаларды қолдауды жалғастыратынын атап өтті.