Қырық екі жыл – темір жолда

«Қазақстан темір жолы» ҰК» АҚ-ның Вагон шаруашылығы департаментінің жеке жүк вагондарын тіркеу тобының бас менеджері Клара Жақыпова биылғы қаңтар айында алпыстың асуын бағындырды.

Оны департаменттегі әріптестерімен қатар «ҚТЖ-Жүк тасымалы» ЖШС-дегі филиал директоры – Бас директордың локомотив шаруашылығы жөніндегі орынбасары Қайраткен Нығметов құттықтап, жылы лебізін білдіріп, әріптестері атынан гүл шоғын тарту етті.  

Клара Тілеулесқызы – теміржолшы әулетінің өкілі. Әкесі станция кезекшісі, анасы билет кассирі болып қызмет етіпті. Бір әке, бір шешеден тараған бауырлары да темір жолда тер төгіп, нәпақаларын тауып жүр екен. Клара да әкенің қанымен, ананың сүтімен берілген кәсіпті өміріне арқау етіпті. Алматыдағы теміржол көлігі инженерлері институтын бітіріп келген ол 1983 жылы еңбек жолын Жосалы станциясында жүк пен багаж қабылдап-тапсырушы болып бастапты. Одан кейін тауар кассирі, аға тауар кассирі қызметтерін атқарған Клара еліміздің солтүстігіне қоныс аударып, Көкшетау бөлімшесінде жоспарлау бөлімінде жұмыс істейді. Ал уақыт өте келе Астанаға жұмысын ауыстырып, қазіргі қызметінің білікті маманы болады.  

– Темір жол – менің өмір жолым десе болады. Мен үлкен саланың тыныс-тірлігімен атаанам арқылы аз да болса таныс болдым. Кейін өзім де темір жолдың ажырамас бір бөлшегіне айналдым. Қарап отырсам, қырық екі жылдық ғұмырымды арнаппын. Теміржолшы болғанымды, өз ісін жетік меңгерген мықты мамандармен жұмыс істеп жатқанымды мақтан тұтамын, – дейді кейіпкеріміз.  

Әріптестері де Клара Тілеулесқызының майталман маман, жақсы дос, жастарға тәлімгер ұстаз екенін айтады. Кейіпкеріміз болса бос уақытында тоқыма тоқып, кітап оқығанды ұнатады екен.