Бірлік-1 станциясындағы берекелі тірлік
Шу мен Шығанақты жалғап жатқан шағын ғана Бірлік-1 станциясы үш торапты да біріктіріп жатыр. Мұндағы шойын жол Шу, Шығанақ, Отар бағыттарына тартылған. Іргеде «Шатыркөл» кен орнының тіршілігі жылдың төрт мезгілінде де қыз-қыз қайнап, станциядағы негізгі тасымал көзі болып отыр.
Осы кәсіпорыннан шыққан мыс рудасы Бірлік-1 станциясы арқылы түу Балқашқа жөнелтіледі. Балқаштағы өңдеу зауыты бұл шикізаттан түрлітүсті металл шығарады. Станциядан орта есеппен ай сайын 800 вагонның шамасында мыс рудасы тиеледі. «Өткен айда 870 вагон арттық, оның алдындағы маусым айында 820 вагон тиеген болатынбыз», – дейді жұмысын бес саусағындай білетін станция басшысының орынбасары Нұрмұхамет Киекпаев.
Демек, әлемдік экономиканың тізесін дірілдеткен пандемиялық төтенше жағдай мен карантин режимі бұл ұжымдардың шаруасына кесірін тигізе қоймаған.
Бірліктің тірлігі қазіргі жиын-терін маусымында тіпті қызып тұр. Жергілікті Шу өңірінің тауар өндірушілері көкөніс артады екен. Соның ішінде пияздың тиелімі мен жөнелтілімі көп. Мәселен, былтырғы науқанда 120 вагон пияз Ресейге қарай жол тартыпты. Ал қазіргі таңда 72 вагон пияз тиеліп, дайын тұрған көрінеді. Станция басшысы орынбасарының сөзіне қарағанда, биылғы өнімділік жылдағыдан жоғары болатын сыңайлы. Өйткені, әлемдік індет қаупіне қарамастан шаруалардың қарқыны жаман емес.
«Қазірде көмір тасымалы қарқын алды. Бұл жұмыс күз болмай басталды, міне, енді сонау мамырға дейін жалғасады. Былтыр осындағы халықты отынмен қамту үшін 130-ға тарта вагон көмір түсірген болатынбыз. Сонымен қатар жөнделіп жатқан Бурылбайтал-Меркі тасжолының құрылысына қажетті заттардың да бірсыпырасы біздің станцияның күшімен жеткізілуде. Айталық, көпір құрастыратын конструкциялар, құбырлар жөнелтілімі жиі жасалуда», – деген Нұрмұхамет Мұхатайұлы төтенше жағдай мен карантин режиміне қарамастан, теміржолшылардың жұмысы бәсеңдемегенін жеткізді.
Станцияның ғимараты барлық талаптарға сай жабдықталған. Күрделі жөндеуден осыдан он жылдай бұрын өткен. Десе де, теміржолшылар шағымданатындай емес. Жылу қазандығы жап-жақсы жұмыс істеп тұр.