Вагон қараушының қырағылығы арқасында жүк пойызы апаттан аман қалды
Атырау облысы бойынша меншікті тілші
Темір жолда кез келген ақау үлкен қиындыққа әкеп соғуы мүмкін. Сондықтан қозғалыс қауіпсіздігіне баса мән беріледі. Жуырда Ганюшкино станциясында вагон қараушының қырағылығы арқасында жүк пойызы апаттан аман қалды.
Құрамында 90 вагоны бар 3010-шы жүк пойызы станцияға келіп тоқтаған соң әдеттегідей оған техникалық қызмет көрсету басталды. Вагон қараушы Ермек Ғарифов бір вагонның қапталындағы раманың жарылып тұрғанын байқады. Мұқият тексере келе онда 12 сантиметрдей болатын жарықтың тереңдеп бара жатқаны анықталды.
Сол сәтте ақау жайлы диспетчерге хабарланып, ақаулы вагон құрамадан ағытып алынды. Вагон «Казфосфат» ЖШС-не тиесілі екен. Соңғы жөндеу жұмысы жамбылдық Ремсервисте жасалған. Вагон қараушының кәсіби деңгейі мен өз ісіне жауапкершілікпен қарағаны нәтижесінде тоқсан вагондық құрама апаттан аман қалды деп айта аламыз. Өйткені, ақаулы вагон пойыздың қауіпсіздігіне қатер төндіретіні айтпаса да түсінікті. Ермек Ғарифов жас маман. Атырау вагон депосының Ганюшкинодағы өндірістік-техникалық бөлімінде 2019 жылдан бері вагон қараушы болып жұмыс істеп келеді. Қозғалыс қауіпсіздігін қамтамасыз етуде жас маманның өзі ісіне жауапкершілікпен қарауы – өзгелерге үлгі боларлық жағдай.