Қырағы жолшылар үлкен апаттың алдын алды

Жамбыл магистральдық желі бөлімшесіне қарасты Шоқпар жол дистанциясының екі жұмысшысы үлкен қауіптің алдын алды. Дистанция басшылығы болуы ықтимал апаттың алдын алған қырағы жігіттерді марапатқа ұсынды.

Оқиға осы жылдың 17 қаңтар күні орын алған. Шамамен сағат 10.24- те Шу – Отар телімінің Көктөбе – Еспе станцияларының аралығында жол шебері Табысбек Төсекбаев пен жол монтері Батыржан Аяпбергенов әдеттегіше жол бойының үстіңгі қабатын тексеріп жүрді. Күн суық, ызғарлы еді. Қаңтардың алғашқы жартысында оңтүстік өңірлерде де қалың қар түсіп, күн суытқаны белгілі.  

Жолшылар желі бойын мұқият сүзіп келе жатып 3788 шақырымда контакт желісінің сынып жатқанын байқаған. Қозғалыс қауіпсіздігі үшін бұл – үлкен қауіп. Дереу іске кіріскен олар жолдың жұп және тақ беттеріндегі қауіпті аймақты қоршап, «қызыл жалаумен» сигнал беру арқылы Көктөбе мен Еспе арасында келе жатқан №3004 жүк пойызын тоқтатты. Орын алған оқиға жайында тиісті орындарды құлағдар етіп, Еспе станциясының кезекшісіне хабар берді. Әрі қарай қозғалысшылар өз құзыреттеріне сай нұсқаулық бойынша әрекет етуге кірісті. Жол дистанциясының жұмысшылары күннің суығына қарамастан ақауды жедел қалпына келтіріп, пойыздар қозғалысын тоқтатқан жоқ.  

Қозғалыс қауіпсіздігіне нұқсан келтірген ақауды дер кезінде анықтап, нұсқаулыққа сай сауатты әрекет ете білген жолшыларға алғыс айтқан Шоқпар жол дистанциясының бастығы Дәулетбек Жолдасбеков «ҚТЖ» ҰК» АҚ Магистральдық желі дирекциясы мен Жамбыл магистральдық желі бөлімшесінің басшылығына екі жолшыны «Қозғалыс қауіпсіздігі үшін» төсбелгісіне ұсыну жайлы хат жолдады.  

Батыржан Аяпбергенов – темір жол саласында 1996 жылдан бері еңбек етіп келеді. 6-шы санаттағы жол монтері. Ал болат жол бойында 1994 жылдан бері тер төгіп жүрген Табысбек Төсекбаев та жоғары санатты жол шебері. Екеуі де тәжірибелі кәсіби жол мамандары.  

– Біздің жігіттердің еңбектері еленсе дейміз. Жолшылардың қырағылығы мен жауапкершілігі, кәсібилігі арқасында үлкен апаттың, одан келетін шығынның да алды алынды деуге болады, – дейді дистанция бастығы Дәулетбек Жолдасбеков.