Контейнерлерге тиеу жағдайы мен жабдықтары бар станцияларда рұқсат етіледі

Тасымалдау қауіпсіздігін қамтамасыз ету үшін осы жылдың 1 қазанынан бастап контейнерлерді тиеу және түсіру техникалық және технологиялық жағдайы мен жабдықтары бар станциялардың кірме жолдарында жүзеге асырылатын болады.

Осылайша, жүк операцияларын жүргізу «Теміржол көлігі туралы» ҚР Заңының талаптарына және мемлекеттік уәкілетті орган бекіткен контейнерлермен барлық немесе жекелеген операцияларды орындау үшін теміржол станцияларын, разъездерді, кірме жолдарды ашу және жабу қағидаларына сәйкес келтірілетін болады.

Сонымен қатар, станциялардың инфрақұрылымдық мүмкіндіктеріне қосымша жүктеме жасайтын тиелген және бос контейнерлердің сапырылысқан   қозғалысы алынып тасталады.

Естеріңізге сала кетейік, COVID-19 пандемиясының шыңында ҚХР астық жүктері бар вагондарды тек контейнерлерде қабылдады. Қазақстандық экспорттаушыларға 2 мыңнан астам вагон қайтарылды. Жүк жөнелтушілердің отандық өнімдерді тасымалдау қажеттіліктерін қанағаттандыру үшін барлық жүк станцияларында контейнерлерді тиеу және түсіру туралы уақытша шешім қабылданды. Қазіргі уақытта қытай тарапы жүктерді штаттық режимде қабылдайды, астық жүктеріне қойылатын барлық талаптар алынып тасталды.

ҚТЖ желісінде 80 станция бар, оның ішінде елдің астық егетін өңірлерінде контейнерлермен жүк операцияларын жүзеге асыру үшін ашық – 28.

 Тармақ иелеріне қозғалыс қауіпсіздігін қамтамасыз ету үшін контейнерлік алаңдарды жабдықтау бойынша жұмыстар жүргізу ұсынылады. Сондай-ақ, уәкілетті органдар бекіткен қағидаларға сәйкес, ҚР Көлік министрлігіне контейнерлермен жұмыс істеу бойынша станциялар мен кірме жолдарды ашу үшін барлық қажетті құжаттарды ұсыну қажет.