Қауіпсіздік шаралары басты назарда
Абай облысы бойынша меншікті тілші
Семейлік теміржолшылар қауымы ұлыстың ұлы күніне орай демалыс күндері де қауіпсіздік шараларын бір сәтке де күн тақырыбынан түсірмей, назарда ұстады.
Мейрам күндері байтақ бөлімше бойынша еңбекті қорғау, өндірістік жарақаттануға жол бермеу және қозғалыс қауіпсіздігін сақтау жөніндегі кешенді жұмыстар толық көлемде жүргізілді. Яғни қызмет орындарында мереке күндерінде де босаңсуға жол берілмейді. Бұл орайда Семей ЖТ бөлімшесінің Қауіпсіздік және еңбекті қорғау, экология бөлімінің мамандары әсіресе түнгі ауысым бойынша рейдтік іс-шаралар жүргізді. Бөлім басшысы Ерлан Сальев пен тораптық станциялардың және қозғалыс саласына жауапты өзге де мекемелер бас инженерлерінің қатысуымен тексеру, қадағалау жұмыстары аясында бірқатар мәселелер назарға алынды. Атап айтсақ, түнгі ауысымға шығатын қызметкерлердің қан қысымын өлшеу, алкотес- тер сынамасын алу шаралары басты орынға қойылды.
Сондай-ақ жоспардан тыс тексерулер барысында локомотив бригадалары мен пойыз құрастырушылар қызметінің де тиісті нұсқаулық бойынша жүзеге асырылуы қадағаланды. Бұл орайда бөлімше басшылығы жүк станциялары мен Семей – Шар, Жаңғызтөбе – Аягөз телімдері бойын да назарға алды. Көктемгі қызыл су қаупі жоғары аймақтар ретінде Жаңа-Семей және Аягөз жол дистанцияларының қарамағындағы участоктар біршама алаңдатқаны рас. Осынау орайда желі бойына шығатын локомотив бригадаларына жіті қырағы болу тапсырылды. Тыңғылықты тексеру, қырағылықты арттыру нәтижесінде өткен бескүндік демалыс барысы тосын оқиғаларсыз өтті.