Қауіпсіздікке қойылар талап қатаң

Бүгінде Семей ЖТ бөлімшесі бойынша қозғалыс қауіпсіздігін сақтаудың кешенді іс-шаралары жоғары деңгейде жүргізілуде. Алаңдатарлық мәселелер де жоқ емес. Әсіресе жол бойындағы қараусыз мал, теміржолдың белгіленбеген жерінен кесіп өтетін жауапсыз жаяу жүргіншілер т.б. ахуалды жіті бақылауға алып, әрдайым сақтық танытуды міндеттейді.

Бұл туралы жуырда Қауіпсіздік департаментінің Семей учаскесі бойынша аймақтық бас ревизоры Темірбек Акчалов өткізген жиын барысында кеңінен талқыланды.

Басқосуда Семей жүк тасымалы және Семей магистральдық желі бөлімшесі басшыларының өткен бес айдағы қауіпсіздік шаралары бойынша жасаған есептері тыңдалып, қозғалыс қауіпсіздігін сақтау бойынша өзекті мәселелер сөз болды.

Айта кетер жайт, өткен бес ай ішінде бөлімше көлемінде қозғалыс қауіпсіздігін бұзу фактілері орын алмаған. Бұл бір есептен РБ-6 аппараты жүргізген іс-шаралар нәтижесінде де орын алып отыр десек қателеспейміз. Мәселен, бөлімше ревизорлары осы уақыт аралығында 308 тексеру, оның ішінде 26 тосын тексеріс, 31 түнгі тексеріс және 251 мәрте жоспарлы түрдегі тексерістер жүргізіпті.  

-Тексеру қорытындыларына сүйенсек, нормативтік-техникалық құжаттардан, жылжымалы құрамдар мен құрылғыларға күтім жасау нормаларын 3980 бұзу және ауытқу оқиғасы анықталды. Соның аясында жалпы саны 781 шектеу шаралары қолданылды және 65 жұмыскер білімдерін қайта шыңдауға жіберілді, - дейді бұл орайда Темірбек Иманғабасұлы.

Орын алған ақаулықтар арасында техникалық үдерістерді бұзу бойынша 1548 кемшілік көрініс тапқан. Демек, семейлік теміржолшылар үшін осы бағыт бойынша күш жұмылдыру қажет деген сөз.  Десекте, желі бойында локомотивтерді шұғыл тежеу жағдайлары өзекті болып тұр. Бес ай ішінде мұндай 51 жайт орын алған.  Өкініштісі,  оның ішінде 14 мал, үш адамды басу фактілері тіркелген. Бұл қараусыз мал бойынша шаруа қожалықтары жауапсыздық танытса, жаяу жүргіншілер жылжымалы құрамнан төнер қауіпті елемейді. НОД-ЖТ және НЖС-6 басшылары осындай жағдайлардың қайталанбауы үшін тиісті мекемелерге төрт хаттама жіберді. Бұл шаралардың сыртында тұрғындарды ақпараттандыру шаралары да тұрақты түрде жүргізілуде.

Жалпы қозғалыс қауіпсіздігін сақтау бойынша РБ-6 аппараты әр ай сайын талдау жасауда. Семей магистральдық желі бөлімшесі және желі бойындағы мекемелер басшыларына жіберілген ақауларды қалпына келтіріп, қауіпсізікті бұзуға алып келетін себептерді қайталамау бойынша ұсыныстар жасалды. Ал, оның орындалу барысы бөлімше басшыларымен қатар аймақтың бас ревизоры Темірбек Акчаловтың да қатаң бақылауында болады.