Дала өртімен күрес: Семей теміржолшылары қауіпсіздік шараларын күшейтті
Абай облысы бойынша меншікті тілші
Семей ЖТ бөлімшесі бойынша орман және дала өрттерінің қауіпті кезеңі өтуде. Қазіргі ахуал қатаң бақылауда тұр. Жергілікті теміржолшылар қауіпсіздік іс-шараларын күшейтуде.
Әйтсе де, қауіп аяқ астынан. Себебі өрттің алдын алуға байланысты қабылданған шараларға қарамастан, биыл табиғи өрттің саны біршама өскен. Жыл басынан бері Семей магистральдық желі бөлімшесі аумағында жалпы саны 252 дала өрті тіркелген. Бұл – өткен жылмен салыстырғанда 4,5 есеге артық көрсеткіш.
Семей ЖТ бөлімшесіне қарасты мемлекеттік емес өрт сөндіру қызметінің басшысы Мұрат Мұқажановтың айтуынша, жергілікті өрт сөндіру пойыздары толықтай тосын жайтқа дайын. Барлық өртке қарсы құрылымдармен тығыз әріптестік орнатылған.
Мәселен, Семей ЖТ бөлімшесінің 119 шақырымды құрайтын Семей – Локоть телімі, яғни «Солтүстік тармақ» өтетін орман аумағында өртті ерте анықтайтын арнайы автоматтандырылған жүйе орнату қолға алынуда.
Сонымен қатар теміржолшылар облыстық азаматтық қорғау басқармасы мен төтенше жағдайлар департаментімен бірлесіп, өңірдегі ерікті өртке қарсы құрылымдардың жұмысын саралап, нәтижесін нақтылауға қатысуда. Жалпы, теміржолшылардың тілсіз жауды ауыздықтауда тәжірибесі мен біліктілігі жоғары. Жыл басынан бері өрт сөндіру пойызы бірнеше мәрте бөлімше көлеміндегі қызыл жалын орын алған жерлерге жедел түрде барып, тілсіз жауды сөндіруге атсалысты.