Жыл басынан бері темір жолда 2 мыңнан астам профилактикалық іс-шара өткізілді
«Қазақстан темір жолы» компаниясы темір жолда адамдардың қаза табуы мен жарақат алу жағдайларын азайту мақсатында кешенді алдын алу шараларын жалғастыруда, деп хабарлайды Rail-news.kz.
2025 жылғы он айдың қорытындысы бойынша 30 адамды басып кету оқиғасы тіркелді. Нәтижесінде 34 адам зардап шеккен, оның 15-і қаза тауып, 19-ы түрлі жарақат алған. Зардап шеккендердің арасында үш кәмелетке толмаған бала бар.
Оқиғалардың басым бөлігі азаматтардың теміржол көлігі нысандарында жүру ережелерін бұзуынан болған. 40% жағдайда (12 оқиғада) зардап шеккендер мас күйінде болған, екі жағдайда – құлаққап киіп жүрген, бір жағдайда – суицид тіркелген.
Сондай-ақ 2025 жылдың 10 айында теміржол өткелдерінде 24 жол-көлік оқиғасы орын алды, оның үшеуі жолаушылар пойыздарының қатысуымен болған.
Мұндай оқиғалардың алдын алу мақсатында жыл басынан бері темір жолда кең көлемді түсіндіру жұмыстары жүргізілді. Әскери күзет және желілік полициямен бірлесіп 1 570 рейд ұйымдастырылып, 2 105 жиналыс өткізілді. Түсіндіру жұмыстары 66 мыңнан астам адамды қамтыды. Рейд қорытындысында ереже бұзушылар әкімшілік жауапкершілікке тартылып, 39 айыппұл салынды.
«Қазақстан темір жолы» азаматтарды темір жолдағы қауіпсіздік ережелерін қатаң сақтауға, жолды рұқсат етілмеген жерден өтпеуге, назарды төмендететін құлаққап және басқа да құрылғыларды пайдаланбауға, сондай-ақ теміржол маңында барынша сақ болуға шақырады.