«Өртке оранған» тепловоз

Атырау ЖТ бөлімшесі Ганюшкино станциясында «ТЧЭ-3 және ТД-26 мекемесіне қарасты локомотивтегі өртті сөндіру» тақырыбында өрт-тактикалық оқу-жаттығу өтті.

Атырау жүк тасымалы бөлімшесінің азаматтық қорғаныс және төтенше жағдайлар бойынша бөлімі, Атырау мемлекеттік емес өртке қарсы қызметінің бастамасымен Құрманғазы аудандық ТЖ басқармасының басшысы, азаматтық қорғау подполковнигі А.Қоңқаевтың «2025 жылға теміржол нысандары мен жылжымалы құрамдарында өрт-тактикалық жаттығулар өткізу» бұйрығына сәйкес өткен оқу-жаттығуға Ганюшкино өрт сөндіру пойызы, аудандық өрт сөндіру бөлімі, ВЖДО 59-шы атқыштар командасы, электрмен қамту станциясы, аудандық аурухана, желілік полиция, вагон, локомотив деполары мен станция қызметкерлері, барлығы 5 техника, 42 адам қатысты.  

Тақырыпқа сәйкес Ганюшкино станциясының №27 тұйық жолында шартты түрде тепловоздың өртенуі орын алды. Электр жабдығы түтіндеп, содан өрт шыққан. Оны байқаған машинист станция кезекшісіне хабарлайды. Ганюшкино станциясының кезекшісі вагон құрастырушыға вагонды дереу құрамадан ажыратуға тапсырма беріп, арнайы оқшауланған жолға шығарады да, Ганюшкино станциясы өрт сөндіру пойызы жанып жатқан вагонды өшіруге кіріседі. Барлық құрылымдардың дер кезінде бірлесе әрекет етуі нәтижесінде тілсіз жау дер кезінде құрықталады. Зардап шеккендер жоқ. Қорытынды бойынша жоспарлы өрт-тактикалық жаттығуға «қанағаттанарлық» деген баға берілді.  

Атырау жүк тасымалы бөлімшесінің азаматтық қорғаныс және төтенше жағдайлар жөніндегі инженері Нұрлан Сұлтанғалиевтің айтуынша, жылына екі рет болатын жоспарлы өрт сөндіру оқу-жаттығуы – жеке құрам мен өртке қатысы бар құрылымдық мекемелердің төтенше жағдайға дайындығын тексеру әрі шыңдау үшін, апатты жағдайда шұғыл шешім қабылдауға үйрену үшін қажетті шара.  

– Тепловозда өрт шыққан жағдайда оны оқшаулап, өртті сөндіру кезінде туындаған төтенше жағдайларды жою кезіндегі шартты түрде өткен оқу-жаттығуға Ганюшкино өрт сөндіру пойызынан 12 адам, станцияның азаматтық қорғау құрылымдарынан 4 адам, әскерилендірілген теміржол күзетінен 8 адам, ЭЧ-ден 3 адам, аудандық өрт сөндіру бөлімінен 7 адам, жедел жәрдем қызметінен 2 адам, 1 пойыз және 5 техника осы шараға жұмылдырылып отыр. Өрт 10 минутта сөндірілді, – деді ол.