Дайындықтарын шыңдады

Болашақ станциясында қалааралық тасымалда жүрген пойыздан өрт шықты. Жолаушылар вагонында пайда болған қызыл жалынды ауыздықтауға оқиға орнына тиісті құрылымдар жедел жетті.

Теміржол көлігіне қатысты өртке қарсы өткен кезекті оқу-жаттығудың сценарийі осылай өрбіді. Күндізгі сағат 11.20 уақытында Болашақ станциясының кезекшісі Б.Әбеновке №6994/6993 Өзен-Болашақ Өзен қалааралық жолаушылар пойызының №24710 вагонында өрт басталғаны туралы хабарлама түседі. Оқиғадан хабардар болған кезекші дереу қажетті мекемелерге ақпаратты жеткізіп, станциядағы тиісті қызметтерді аяққа тұрғызады. Арада он минут өткен соң Болашақ өрт сөндіру пойызының «Камаз» АЦ-7-60 өрт сөндіру автокөлігі деподан толық құрал-жабдығымен оқиға орнына аттандырылып, 11.40 минутта өртеніп жатқан вагонға өрт сөндірушілермен бірге жетіп, өз қызметіне кіріседі. Көп ұзамай вагонның жан-жағын «жалмап» жатқан тілсіз жау ауыздықталып, толықтай сөндірілді. Өз міндетін орындаған құтқарушылар командасы 12.15 минутта оқиға орнынан депоға қарай қайта бет алды.  

– Бұл біздің жыл басынан бергі төртінші оқу-жаттығуымыз. Әр тоқсанда бір рет дайындықты сынақтан өткізіп отырамыз. Осы жолы «Камаз» АЦ-7-60 өрт сөндіру автокөлігін тарта отырып, өрт сөндіру депосынан 2 км қашықтықтағы пойыздан шыққан өртті сөндіру барысын сынап көрдік. Бәрі ереже бойынша, ойдағыдай өтті. Өрт сөндіру техникасы ереже бойынша қыс мезгілінде өрт болған жерге 20, жаз маусымдарында 10 минуттан кешікпей жетіп баруға тиіс. Біз осы оқу-жаттығу барысында 10 минутта жиналып, 10 минуттың ішінде сол жерден табылдық. Аталған дайындықты тексеру іс-шарасына өрт сөндіру пойызынан – 9, Болашақ станциясынан – 20, әкімдіктен – 2, ПЧ мекемесінен – 10, Теміржолсудан – 4, ТҚКП-нен – 6, вокзалдан – 1, белгі беру және байланыс дистанциясынан – 3, теміржол күзетінен – 4, электрмен жабдықтау дистанциясынан – 3, қаламаңы тасымалы мекемесінен 2 адам қатысты, – дейді Болашақ өрт сөндіру пойызының қызметкері Ерболат Бытықов.