Семейде сақтық шаралары күшейтілді

Семей ЖТ бөлімшесінің теміржолшылары желі бойындағы қауіпсіздік шараларын күшейте түсті. Оған себеп те жоқ емес. Желтоқсан айының 27-нен бастап мектеп оқушыларының қысқы каникулға шығуы, жаңажылдық мерекелік қарбалас теміржол бойындағы сақтыққа назар аударуды қажет етеді.  

Әсіресе қала ішіндегі жаяу жүргіншілер өтпелеріне, қозғалыс жиілігі аса жоғары аумақтарға басымдық берілген. Соңғы көрсеткіштерге сүйенсек, жол бойындағы адамдар себебінен шұғыл тежелу фактілері орын алуда. Соның ішінде жыл бойында үш мәрте адам басу оқиғалары тіркеліпті. Өліммен аяқталғандары да бар. Барлығы да қала ішінде орын алған. Осыған орай бөлімшеге қарасты бірқатар мекемелер мамандары түсіндіру жұмысын күшейтті. Мәселен, ТЧЭ-24 мекемесінің теміржолшылары желі бойына таяу орналасқан мектептер мен колледждерге барып, қауіпсіздік бойынша арнайы дәрістер өткізіп, тіпті әр оқушының партасына нұсқаулықтар жазылған парақшалар мен жадынамалар қалдырды.  

Сонымен қатар студенттер қауымы мен оқушылар жиі өтетін жаяу жүргіншілер өтпелері бойында рейд жүргізіп, әр адамды жеке әңгімеге тартты. Әсіресе халық нөпірі мол «Жансая» базары аумағы мен Педагогикалық колледж тұсындағы жол өтпелерінде нәтижелі жұмыс жүргізілді.  

Дәл осындай іс-шараларды «ӘТЖК» Семей филиалы мен ПЧ-39 мекемесі де өткізіп жатыр. Ақпараттандыру жұмыстары барысында мәлім болғандай, көпшілік, әсіресе жастар жағы теміржол өтпелері маңындағы қауіпсіздік шараларын сақтамайтыны анықталды. Құлаққап киіп, тоқтап тұрған жылжымалы құрамдардың астынан өтетіндер көп екен.    

– Биылғы жазда Белағаш – Дүйсекен телімі арасындағы 28 шақырым аумақты күрделі жөндеуден өткіздік. Жазғы жол күтімі ойдағыдай өтті. Қысқы мезгілге жоғары даярлықпен кірдік. Ендігі маңызды міндет қауіпсіздік болып тұр. Әсіресе станциялық жолдар мен жаяу жүргіншілер өтпелеріндегі сақтық шаралары күшейтілді, – дейді Семей жол дистанциясының бас инженері Мырзабек Керейбаев.