Теміржол бойындағы қауіпсіздік шаралары күшейтілді
Абай облысы бойынша меншікті тілші
Желі бойындағы жүк тасымалының артуы күзет шараларын күшейтуді де талап етуде. Бұл ретте тек тораптық станцияларда ғана емес, шағын жол айрықтарына да баса мән берілуде.
«Әскерилендірілген теміржол күзеті» ЖШС Семей филиалының өңіраралық шұғыл әрекет ету оңтайлы тобының жеке құрамы жоспарлы жұмыстарды барынша күшейтуде. Атап айтсақ, профилактикалық, қауіпсіздік сақтау және теміржол бойындағы ұрлық фактілерінің алдын алу мақсатындағы іс-шаралар қатарын ұйымдастыру жұмыстары тың бағытта жүргізіліп жатыр.
Бүгінде Самат Райымбеков басшылық ететін филиал жігіттері желілік полиция қызметкерлерімен бірлесіп жұмыс жүргізуді де жолға қойған. Мәселен, жуырда Семей, Жаңа-Семей және Аягөз станциялары аумағында күдік тудыратын азаматтардың құжаттары тексеріліп, теміржол бойында қауіпсіз жүріп-тұру тақырыбында нұсқамалар жүргізілді. Желі бойында жұмыс жүргізіп жатқан теміржолшылардың іс-әрекеттері де назарға алынды.
– Қызметтің негізгі мақсаты – қызметкерлердің қауіпсіздік шараларын сақтауын, жүк құрамаларының ақаусыз түрде белгіленген орындарға жеткізілуін қадағалап, әкімшілік құқық бұзушылықтың алдын алу. Профилактикалық жұмыстар тәулікпен санаспай жүргізілуде, – дейді бұл ретте ӘТЖК Семей филиалы басшылығы.
Белгілі болғандай жылжымалы құрамдардан жиі ұрланатын тауар – көмір. Шағын станциялардағы 5-10 минуттық аялдаудың өзі қатты отынды қаптап алуға жетіп жатыр. Десек те, соңғы уақыттары қадағалау шараларының күшейтілуі себепті мұндай фактілерге жол берілмегенін айта кету керек.
Жүк құрамдарының қозғалысы барысында қауіпсіздік тек тепловоз кабинасынан ғана бақыланып қоймайды. Қызметтік көліктер мен түнгі мезгілде күндізгідей көруге мүмкіндік беретін бірегей бинокльдер, квадракоптерлер пайдаланылады. Желі бойын барлау мен әуеден бейнетүсірілім жасау және мониторинг жүргізу үшін дрон тәрізді ұшқышсыз басқарылатын аппараттарын қолданудың маңызы зор. Яғни пойыздардың қауіпсіздігі биіктен де бақыланады. Түйіндей айтсақ, бүгінгі Семей теміржолының 1394 шақырымдық телімі сенімді қолда.
