Ақтөбе станциясында күйдіргіге қарсы оқу-жаттығу өтті

Ақтөбе станциясында күйдіргі дертіне күдік анықталған жағдайдағы іс-қимыл алгоритмі пысықталды. Оқу-жаттығуға теміржол, санэпидстанция, құқық қорғау және төтенше жағдай қызметтерінің мамандары қатысып, өзара іс-қимыл деңгейі тексерілді.

Жаттығу станцияға келіп тоқтаған вагондарда жоспарлы түрде өтті.  

Іс-шараны Ақтөбе бөлімшелік көліктегі санитарлық-эпидемиологиялық бақылау басқармасы ұйымдастырды. Сценарий бойынша санитарлық-карантиндік тұйықта күйдіргіге күдік анықталды. Мамандар науқасты оқшаулау, байланыста болған адамдарды анықтау және індеттің таралуына жол бермеу бойынша әрекеттерді пысықтады.  

– Мұндай оқу-жаттығулар қызметтердің дайындық деңгейін арттыруға мүмкіндік береді. Жаттығу шынайы жағдайға барынша жақын ұйымдастырылады. Бұл мамандардың төтенше жағдайда қалай әрекет ету керектігін пысықтап, барлық қызметтердің үйлесімді жұмысын қамтамасыз етуге септігін тигізеді, – деді Ақтөбе бөлімшелік көліктегі санитарлық-эпидемиологиялық бақылау басқармасының санитарлық-эпидемиологиялық бақылау бөлімі басшысының міндетін атқарушы Сұлушаш Жұмағазина.  

Оқу-жаттығуға «Жолаушылар тасымалы» АҚ «Батыс» филиалының қызметкерлері, облыстық клиникалық жұқпалы аурулар ауруханасы, жедел медициналық жәрдем қызметі, Ақтөбе обаға қарсы станциясы, Ұлттық сараптама орталығы, желілік полиция мен әскерилендірілген теміржол күзеті қатысты.