Қарапайым ережені сақтайық
Темір жол – мыңдаған жолаушы мен миллиондаған тонна жүкті тасымалдайтын заманауи логистикалық жүйе. Соған сәйкес бұл аймақ үлкен жауапкершілік пен қатаң тәртіпті талап ететінін есте ұстаған жөн.
Бүгінде темір жол мен өткелдер маңында орын алып жатқан қайғылы оқиғалардың басым бөлігі қарапайым қауіпсіздік ережелерін сақтамаудан, салғырттық пен асығыстықтан туындап отыр. Сондықтан темір жол сақтықты, мұқияттылықты және жауапкершілікті талап ететін жер екенін тағы қайталап айтамыз. Өміріңіз өкінішке айналмасын десеңіз, қарапайым ережені елеусіз қалдырмай, әрбір қадамды ойланып басқан жөн. Өйткені үлкен жылдамдықпен келе жатқан пойыз шұғыл тежеу қолданылғанның өзінде тоқтауы 800-ден 1000 метрге дейінгі аралықты құрайды. Демек, машинист рельстегі адамды немесе кедергіні көрген сәтте пойызды бірден тоқтата алмайды. Сонымен қатар қазіргі заманғы заманауи пойыздардың дыбыссыз қозғалатыны сонша, артынан жақындап қалған құрамның қаупін соңғы секундқа дейін сезбей қалу қаупі өте жоғары.
Алматы магистральдық желі бөлімшесі Ақтоғай станциясының мамандары жергілікті тұрғындармен кездесу ұйымдастырып, профилактикалық жұмыстарды күшейтті. Бүгінгі цифрлық дәуірде жаяу жүргіншілердің, әсіресе жастардың құлаққаппен жүруі, телефонға алаңдауы немесе рельс үстінде селфи жасауға ұмтылуы өмірге төнген тікелей қатер екенін жеткізуге тырысуда. Қауіпсіздік ережелері бойынша темір жолды тек арнайы белгіленген жаяу жүргіншілер өткелінен, көпірлер мен туннельдерден өту қажет. Өткелге жақындағанда құлаққапты шешіп, жан-жаққа мұқият қарап, дыбыстық және жарық сигналдарына мән беру әрбір азамат үшін әдетке айналуы тиіс.
Сондай-ақ темір жол бойындағы электр желілеріндегі кернеу 27 000 вольтке дейін жететінін ескерсек, вагон үстіне шығу немесе бағаналарға жақындау тікелей тоқ соғу қаупін тудырады. Тоқтап тұрған пойыз вагондарының астынан өтуге әрекеттену де өз өміріңді қатерге тігумен бірдей, себебі құрам кез келген секундта қозғалып кетуі мүмкін.
Серікбек МУРУМБАЕВ,
Алматы магистральдық желі бөлімшесі
Ақтоғай станциясы бастығының орынбасары