ӘТЖК 100 жылдығына орай Ақмола филиалының озаттары марапатталды
«Қазақстан теміржолшысы» газетінің тілшісі
Сала қауіпсіздігін бір ғасыр бойы қамтамасыз етіп келе жатқан Әскерилендірілген теміржол күзеті қызметіне биыл – бір ғасыр. Тәуелсіздік мерекесі қарсаңында елордада өткен «ӘТЖК» ЖШС-нің жүз жылдық мерейтойына арналған шарада саланың бүгінгі және кешегі буыны бас қосты, деп хабарлайды Rail-news.kz. Тарихқа көз салсақ, сонау 1921 жылы 9 желтоқсанда Бүкілресейлік Орталық атқарушы комитет Қаулысымен жол қатынастарының ведомстволық күзет қызметінің негізі қаланған екен. Станциялар мен теміржол парктеріндегі, қоймалардағы және жолда келе жатқан пойыздардағы жүктердің қауіпсіздігі мен сақталуы, темір жол көлігінің инженерлік құрылымдарының күзеті жаңа саланың міндеті болып белгіленеді. Міне, содан бері жүз жыл сол міндетті абыроймен атқарып келе жатқан күзет қызметін талай тар жол, тайғақ кешуді бастан кешіп, теміржол көлігімен қоса дамып келеді.
– Әскерилендірілген темір жол күзетінің қалыптасып, дамуына атсалысқан алдыңғы аға буынның ерлік істері бүгінгі ұрпаққа жеткен. Тіпті бұл салада әскери күзетшілер қызметі ұрпақтан ұрпаққа мирас болып, бірнеше буын алмасқан әулеттері де қалыптасты. Теміржолдың қырағы күзетінде адал еңбекпен абыройлы қызмет етіп, өз міндеттерін мінсіз атқарып жүрген олардың бірқатары бүгін арнайы марапаттарға ие болады. Бүгінгі таңда біздің филиалда «Үздік күзетші» белгісін иеленген 48 күзетші жұмыс істейді. Бұл біз үшін үлкен мақтаныш пен абырой, – деді мерекелік жиында сөз алған «ӘТЖК» ЖШС Ақмола филиалының директоры Жанболат Күнкенов.
Салтанатты шарада саланың жүз жылдық тарихынан сыр шертетін арнайы бейнеролик көпшілік назарына ұсынылды. Күзет қызметінің қырағы сарбаздары «Алғыс хатпен», Құрмет грамотасымен, «Үздік күзетші» белгісімен және «ӘТЖК-100 жыл» арнайы төсбелгісімен марапатталып, ардагерлер естелік айтты. Олардың қатарында өмірінің 43 жылын осы салаға арнаған ардагер Нұрлан Ыбыраев, Құрметті теміржолшы, кәсіподақ қызметін жандандырып жүрген зейнеткер Надежда Горбылева, атқыштар командасының ардагері Шаймерден Бекбатыров күзет қызметінің даму кезеңдері туралы тамаша естеліктерімен бөлісті. Темір жол көлігінде құқық бұзушылықтың алдын алуға және ішкі істер органдарымен белсенді іс-қимыл жасауға қосқан үлесі үшін ҚР ІІМ Алғыс хатымен «ӘТЖК» ЖШС Ақмола филиалы директорының орынбасары, әскерилендірілген күзетті ұйымдастыру бөлімінің бастығы Андрей Меринян, Көкшетау станциясындағы атқыштар командасының бастығы Ерлан Әлмұхамбетов, күзет қызметіндегі табысты еңбегі үшін Күзет ұйымдары қауымдастығының грамотасымен Ербол Бекхожин марапатталды. Бұдан басқа 50-ден аса қызметкер серіктестік қызметін сапалы ету, міндеттерді жүзеге асыру жолында атқарған ерен еңбектері үшін Алғыс хаттарға ие болып, «ӘТЖК-100 жыл» төсбелгісін тақты. Ал «Үздік күзетші» белгісі Нұр-Сұлтан станциясындағы атқыштар командасының күзетшісі Мұрат Омаровқа, Қырқыншы станциясындағы атқыштар тобының күзетшісі Қайырбек Диханбаевқа берілді.