Маңғыстауда темір жол мүлкін ұрлайтын сұғанақ қол оқушылар көбейіп барады
Маңғыстау облысы бойынша меншікті тілші
Өкінішке орай, соңғы кезде теміржол мүлкіне қол сұғушылар көбейіп барады. Оңай олжаға кенелмек болғандар қатарында жасөспірімдер қылмысы артқаны теміржолшыларды алаңдатып отыр... Өткен жылы Маңғыстау жол дистанциясы аумағында үш ұрлық болса, биылғы қарашаның өзінде бес факті тіркеліпті. Пайдакүнемдер енді теміржолшылардың киіміне де ауыз салған. 30 қараша күні күзетпелі қоймадан он дана қыстық күрте ұшты-күйлі жоқ болған. Бұған дейін жолға шыққан малмен алысқан жолшылар енді өздеріне тағы бір жаңа міндет жүктеп отыр, олар бұдан былай ізкесушілікті қосымша кәсіп етпеске амалымыз жоқ дейді.
– Маңғыстау жол дистанциясы бойынша биыл 11 айда алты ұрлық тіркелді. Соның бесеуі қарашада. Келтірілген шығын – 484 мың теңге. Қарашаның 17 және 19 күндері араға күн салып екі бірдей ұрлық болғандықтан, дәніккеннен құныққан жаман деген, тағы келеріне сенімді болып тұзақ құрып, үшінші рет ұрлық үстінде ұстадық. Көліктерін тексергенде біздің біраз бұйым шықты. Металлоломға тапсырмақ екен. Тапсыратын жеріне барып, ол жерден де бірталай мүлкімізді қайтарып алдық. Осы әрекетті істеп жүрген жаңаөзендік тоғызыншы сыныпта оқитын төрт оқушы екен. Әрі қарай олардың ісімен желілік полиция бөлімшесі айналысады. Бұл – Өзен мен Жетібай станциялары арасында болған оқиға, – дейді Маңғыстау жол дистанциясының жетекші инженері Мұхтар Кульчанбаев.
Дистанция қызметкерлері желілік полиция өкілдерімен бірлесіп тұрғындармен, мектеп оқушыларымен түсінік жұмыстарын жүргізуде.