Қандыағаш станциясындағы №5 қалпына келтіру пойызына 85 жыл толды

«ҚТЖ» ҰК» АҚ Ақтөбе магистральды желі бөлімшесі Қандыағаш станциясындағы №5 қалпына келтіру пойызының іске қосылғанына 85 жыл. Темір жолдағы табиғи және техногенді сипаттағы апаттар кезінде көмек көрсетумен кәсіби айналысатын мекеме ғасырға жуық қауіпсіздікке қалтқысыз қызмет етіп келеді. Мамандандырылған жылжымалы құрам теміржолдағы апатты жағдайды жойып, пойыздар қозғалысын жылдам қалпына келтіреді. 2013 жылдан бері Рустам Қарабалин басқаратын мекемеде 30 адамнан тұратын бригада – пойыз бастығы, кондукторлар, бригадирлер, краншылар, краншылардың көмекшілері, жүк тиеуші, бульдозерші, тракторшы, электр станциясының машинисі, дәнекерлеуші, слесарь, электрик сияқты мамандар бар. Олардың бәрі – өз мамандықтары бойынша мінсіз дайындалған тәжірибелі теміржолшылар.

«Қалпына келтіру пойызы теміржол жұмысындағы маңыз- ды құрылым болып табылады. Бізде әртүрлі мамандық өкілдері жұмыс істейді, бірақ бәріміздің айналысатын ісіміз ортақ. Басты міндетіміз – теміржол апаттарының салдарын жою. Жұмысымыз төтенше жағдайлар министрлігінің жұмысына ұқсас, күндіз-түні дайындық сапындамыз. Жұмыстың басты талабы шұғыл әрекет етуді ұйымдастырудан басталады. Бұйрық алғаннан кейін депо кезекшісі 15 минут ішінде локомотивті беруге міндетті, өйткені 40 минутта пойыз жөнелтілуі керек. Қалпына келтіру пойызы техникалық реттеу жұмыс- тарына қажетті нәрсенің бәрімен жабдықталған. Көтергіш крандар, қосалқы арбалары бар такелаждық вагондар мен автономды электр станциясы, прожекторлары, арқандары бар вагон әрдайым дайын тұрады. Сондай-ақ пойызда қалпына келтіру жұмыстарын бақылайтын қызметкерлер вагоны бар», – дейді №5 қалпына келтіру пойызының бастығы Рустам Балтабайұлы.

Мекемені әр жылдары басқарған өз саласының кәсіби мамандары саналатын В.Ткаченко, Б.Клименко, Н.Полиничко, С.Лысяк, Ю.Машников, Ш.Майсутов есімдерін ұжым мақтанышпен еске алады. Ұзақ жыл осы мекеменің дамуына қызмет еткен Ж.Майсутов, К.Борашев, В.Головко, М.Нағымов, К.Айжарықов, В.Молодец, Н.Пономаренко және А.Гончаровтың еңбегі зор. Бүгінгі күні аға буынның даңқты еңбек жолын лайықты жалғастырып келе жатқандар қатарында Нұржан Мұқанов, Сәдуақас Айжарықов, Айым Жақыпова, Аксения Айжарықова, А.Пономаренко, Ж.Сүйінғариндер есімі құрметпен аталады.