Маңғыстау теміржолында соңғы бір ай көлемінде қауіпсіздікке баса мән берілді

Маңғыстау теміржолында соңғы бір айдың көлемінде басшылық пен жұмысшылар арасында бірнеше кездесу ұйымдастырылды. Мақсат – біреу. Қауіпсіздікке нұқсан келтіретін факторларды жою және болдырмау жолдарын пысықтау. Жергілікті жиындарда өткен айда басталып, желтоқсанда аяқталып жатқан «Назар аударыңыз – машинист, маневрлік жұмыс!», «Тежегіш табандық – ерекше бақылау!» айлықтарының мән-жайлары мен анықталған кемшіліктердің себеп-салдарлары талқыланды. Маңғыстау қосалқы бөлімі басшысының бірінші орынбасары Е.Бүркітовтің төрағалығымен станциялардың, вагон және локомотив деполарының ұжымдарымен өткен басқосулар өзара сұхбат, сұрақ-жауап форматында өтті.

– Айлықтың шеңберінде осындай талқылау жиындарын өткізудеміз. Алдымен Бейнеу станциясында, сосын Шетпе, Сай-Өтес, Маңғыстау станцияларында жалғасты. Барлығында көтерілген бір мәселе – қауіпсіздік жағдайы. Табантежегішпен қалай жұмыс істеу керек, маневрлік жұмыс- тардың қауіпсіз жүргізілуі, орын алған қателіктер талданып, тақыланды. Сонымен қатар ел теміржолында болып жатқан жағдайлармен таныстыру, қауіпсіздікке нұқсан келген оқиғалардың шығу себептері мен салдары, одан сабақ алу жолы айтылды. Тексерістер барысында анықталған қате-кемшіліктерді жою жолдары да сөз болды, – дейді Маңғыстау қосалқы бөлімі басшысының бірінші орынбасары Е.Бүркітов.

Жиын қорытындысы бойынша кемшіліктердің алдын алу, түзету мақсатында арнайы тапсырмалар берілді. Станция басшылары осы тұрғыдан жүргізіліп жатқан жұмыстармен таныстырды. Сондай-ақ, бұл басқосуларда теміржолшы- лардың кәсібіне сай біліктілігі де сынға түсті. Кейбір қызметкерлерді қайта сынақтан өткізу қажеттігі айтылса, енді бірлерінің өз ісіне ұқыптылығы мен жауапкершілігі өзгелерге үлгі етілді. Сонымен қатар ГПЗД/12022-и телеграфтық нұсқауында көрсетілген пайдаланылмаған маршрутпен маневрлік жұмыс жасау бұйрығын барлық машинистер мен станция кезекшілеріне мұқият оқыту, станцияларда техникалық жұмыс жүйесінің талаптарын, қызметтік нұсқаулықтардың орындалуын қатаң тексеру, кірме жолдарда вагондарды беру және алу келісімшарттарының, кірме жолда қозғалысты ұйымдастыру және қызмет көрсету тәртібі нұсқаулығының сәйкестігіне, дұрыстығына тексеріс жүргізу міндеттері қойылды. Сондай ақ, стандартты емес жағдай орын алған уақытта станция басшылығы кезекшінің іс-әрекетін жеке бақылау үшін қасында болу керектігі және вагондарды табандық тежегішпен дұрыс бекітуіне бақылау күшейтілуі, қызметкерлердің міндетін дұрыс орындауына, жылжымалы құрамалардың және жекелеген вагондардың дұрыс бекітілуіне, сөйлесу регламентін қатаң сақтауға бақылау қажеттігі талап етілді. Сайып келгенде, қауіпсіздікке талап барынша күшейтілді.