Маңғыстаулық теміржолшылар жол-көлік оқиғаларына кінәлілерді анықтауда «Сергек» камераларына мұқтаж

Көлік қатынасы көп теміржол өткелдеріне «сергек» камерасын орнату қажет дейді мамандар. Себебі кейбір жүргізушілер пойызбен жарысып, жабық тұрған жолдан өте шығуға асығатын көрінеді. Ал бейнебақылау камерасы тұрғасын ереже бұзуға қаймығып, еріксіз аяқ тартады. Дегенмен, камера орнатылған кейбір өткелдерде орын алған жол-көлік оқиғасын анықтау да кейде қиынға соғып жатады екен. Себебі, тұрақты техникалық күтім жасап тұрмағасын кейде ашылмай қалып жатқандары да бар деседі.

– Өткен он бір айда Маңғыстау жол дистанциясына қарасты теміржол өткелдерінде 7 рет ереже бұзушылық болды. Соның төртеуінде жол полициясының қызметкерлеріне бейнебақылау болмағандықтан оқиғаның толық суретін анықтау қиынға соқты. Кейде бақылау құрылғысында өткелден өту тәртібін бұзған жүргізушілер көлігінің нөмірі де көрінбей жатады дейді. Дегенмен, жоқтан бар жақсы, біз қазір «сергек» камерасына ұсыныс беріп жатырмыз. Жақсы құрылғының құны шамамен 700-800 мың теңге тұрады екен. Жоғары басшылыққа және облыстық ішкі істер департаментіне хат жібердік. Енді келер жылдан үміт етіп отырмыз, – деген Маңғыстау дистанциясының жетекші инженері Мұхтар Кульчанбаев «сергек» ілініп тұрса, теміржол өткелінен өтетін автокөлік тізгіндеушілер қауіпсіздікті ойламаса да, камераға ілініп, айыппұл арқаламау үшін тәртіпке бағынатынына сенімді.

Бүгінде «сергек» камерасы Маңғыстау жол дистанциясына қарасты 34 өткелдің тек біреуінде ғана бар екен. Күзетпелі төрт өткелдің қалған үшеуінде – теміржолшылар өздері орнатқан қарапайым бақылау құрылғысы. Оның да біреуі істен шығыпты. Ал өткелдегі жол-көлік оқиғасы өткен жылғыдан артқан. Себеп – жеңіл көлік жүргізушілерінің қарапайым сақтық шараларын сақтамауы. Сондай немқұрайлылықтың салдарынан түбек теміржолының 13-шақырымдағы өткелінде «Ниссан Максима» жеңіл көлігі маневрлік тепловозбен соқтығысқан. Бұдан басқа Жаңаөзенде автокөлік иесі бағдаршамның қызыл шамына бағынбай, автоматты шлагбаумды соғып кетіпті.

– Осы жылы түбектегі барлық теміржол өткелдері тексерілді. Қорытындысы бойынша Маңғыстау мен Р бекеті аралығындағы екінші шақырымдағы жекеменшікке қарасты өткелдің кем-кетігі ретке келтірілді. Енді 314-шақырымдағы біздің өткелге қарама-қарсы тұрған «КаспийЦемент» мекемесіне қарайтын өткелді де жөндеуге ұсыныс береміз. Ескіріп, жарамсыз күйге шақ қалып тұр, – дейді Мұхтар Кульчанбаев.