Семейде ӘТЖК 100 жылдығына орай ардагерлер мен озат мамандарға сый-сияпат жасалды
Абай облысы бойынша меншікті тілші
«Әскерилендірілген темір жол күзеті» ЖШС-нің ел шығысындағы Семей филиалы да өзінің жүз жылдық мерейтойын кең көлемде атап өтті, деп хабарлайды Rail-news.kz. Айтулы дата алдымен сала ардагерлері үшін үлкен мерей екені анық. Сондықтан филиалдың кәсіподақ ұйымының төрағасы Амантай Қатпенов бастаған топ салаға еңбегі сіңген ардагерлерге құрмет көрсетті. Олардың арасында жуырда ғана 90 жасқа толған Хабдулжаппар Мухамадиев ақсақал мен теміржол күзетінде көп жылдар еңбек еткен зейнеткер Құсайын Ахметов бар. Жүз жылдыққа арналған салтанатты шарада филиал басшысы Самат Раимбеков көпшілікті мерейтоймен құттықтады.
– Бүгінде филиал қарамағындағы барлық нысандар сапалы күзет жасақтарымен қамтамасыз етілген. Мұның барлығы – әлбетте, қырағылық пен қажырлылықты талап ететін үлкен жұмыс. Өткен жылмен салыстырғанда биылғы жылы желі бойында ұрлық-қарлық саны он бес пайызға артқаны байқалады. Бұл, әрине, бізді де алаңдатады. Сондықтан Семей филиалының ұжымы алдағы уақытта өзіне жүктелген міндеттерді атқаруда жауапкершілік пен қырағылықты арттырады. Бүгінгі таңда ол үшін барлық жағдай жасалған, – деді Самат Ғазизұлы.
Филиал басшысы атап өткендей, ерен еңбегімен ерекшеленген жандардың қатары мол. Мәселен, күзетті ұйымдастыру бөлімінің бастығы М.Қыңырбеков, 1-ші санатты инженерлер К.Ахатаев, Қ.Базарғалиев, А.Мұхамеджанов, сондай-ақ, шұғыл оңтайлы әрекет ету тобының бастығы Ш.Мамырбеков, Өскемен-1 станциясы атқыштар командасының бастығы Қ.Нығметжанов, осы команданың аға күзетшілері Б.Сырымбаев, А.Мұқашев – ұжымның абырой беделін арттыратын кәсіби мамандар. Сонымен қатар, үздік қызметкерлер ұлттық компания басшысының құрмет грамотасымен, басшылықтың мақтау қағаздарымен марапатталды. Сондай-ақ, 100 жылдыққа орай арнайы шығарылған төсбелгілер табыс етілді. Қонақтарға кәдесыйлар тарту етілді.