Атырауда 200-ге жуық теміржолшы марапатталды

Тәуелсіздіктің 30 жылдық мерекесіне орай Атырау жүк тасымалы және магистральдық желі бөлімшелерінде еңбек ететін екі жүзге жуық теміржолшы түрлі марапаттарға ие болды. Өңірде екі адам «Құрметті теміржолшы» атағын иеленді. Олар – Атырау магистральдық желі бөлімшесі бастығының пайдалану жөніндегі бірінші орынбасары Ж.Жүнтүрбаев пен Атырау вагон пайдалану депосының Мақат станциясы техникалық қызмет көрсету пунктінің вагон қараушысы А.Абитов. Екеуі де салада отыз жылдан аса уақыт еңбек етіп келе жатқан айтулы мамандар. «Үздік басшы» төсбелгісімен бөлімше басшысы А.Базарғалиев пен Мақат станциясының бастығы М.Басанов, Атырау электрмен жабдықтау дистанциясының бастығы Б.Досжанов, «Қазақстан тәуелсіздігіне 30 жыл» мерекелік медалімен Атырау магистральдық желі бөлімшесінің директоры Е.Сапаров пен Ақжайық станциясы өрт сөндіру пойызының бастығы А.Қалиманов, ал, Атырау жол дистанциясының бастығы А.Жылқыбаев «Ерен еңбегі үшін» медалімен марапатталды. «Адал еңбегі үшін» төсбелгісімен Сағыз станциясының бастығы Н.Дүйсенбайұлы, Мақат станциясы техникалық қызмет көрсету пунктінің аға вагон қараушысы Ә.Сағындықов, Ганюшкино станциясы айналма депосы бастығының орынбасары Е.Тарихов, Мақат локомотив пайдалану депосының тепловоз машинисі Т.Ертлеуов, Атырау магистральдық желі бөлімшесінің персонал жөніндегі менеджері Ш.Туманова, Атырау жол дистанциясының бас механигі М.Утегенов, электромеханик Б.Сағынов, Құлсары жол дистанциясының машина пайдалану және жөндеу шебері Б.Тілеубаев, Құлсары белгі беру және байланыс дистанциясының өндірістік оқыту шебері М.Садиров марапатталды. Сонымен қатар «Кәсібі бойынша үздік», «Үздік маман» атанған, «ҚТЖ» ҰК» АҚ Басқарма төрағасының және өңірлік басшылардың Құрмет грамотасы және Алғыс хатымен марапатталған мамандар мерейі өсті. Шара барысында өңірлік өнер жұлдыздарының қатысуымен мерекелік концерт өтті.