Қандыағаш вагон пайдалану депосының екі жұмыскері «Құрметті теміржолшы» атанды

Тәуелсіздік мерекесі күні Ақтөбе темір жолы бөлімшесінде өткен салтанатты шарада аймақ теміржолының қалыптасуы мен тәуелсіздік жылдары қол жеткізген жетістіктері насихатталып, еңбек майданының батырлары алғысқа бөленді. Биыл Қандыағаш вагон пайдалану депосының қос бірдей азаматы «Құрметті теміржолшы» төсбелгісімен марапатталуы вагон шаруашылығы еңбеккерлерінің мерейін үстем еткен айтулы оқиға болды. Олар – депо бастығы Еркін Жананбаев пен өндірістік оқыту шебері Миржан Жұмабаев, екеуі де салаға еңбегі сіңген кәсіби теміржолшылар. Еңбектегі жетістіктері үшін «Адал еңбегі үшін» кеуде белгісімен марапатталғандар қатарында Ақтөбе жол дистанциясының бастығы Кеңес Нұртаев, Ақтөбе магистральдық желі бөлімшесі филиалының техникалық бөлім бастығы Серік Зұлхарнаев, Қандыағаш вагон пайдалану депосы техникалық қызмет көрсету депосының жылжымалы құрамды жөндеу слесарі Жұмалы Еламанов, Ақтөбе вокзалының шебері Анархан Еркебаев, пойыздар қозғалысын басқару орталығының диспетчері Серік Миркемелов болды. Сонымен қатар, Жіңішке станциясы, Ақтөбе белгі беру және байланыс дистанциясы, Ақтөбе мемлекеттік емес өртке қарсы қызмет және Ақтөбе материалдық-техникалық жабдықтау базасы мекемелерінің басшылары «Үздік басшы» номинациясымен марапатталды. Бұдан басқа «Кәсібі бойынша үздік», «Үздік маман» белгісімен, Алғыс хатпен марапатталғандар қатары мол болды. Салтанатты шара мерекелік концертке ұласты.