Ақтөбеде үздік шыққан 30 белсенді жастың ішінде теміржолшы да бар
Ақтөбе облысы бойынша меншікті тілші
Тәуелсіздіктің 30 жылдығына Ақтөбе облысының әкімдігі қаланың қоғамдық-саяси өміріне белсене араласып, түрлі салада жетістікке жеткен 30 жасты марапаттады. Олардың қатарында теміржолшылар да бар.
Ақтөбелік теміржолшы жастарға жетекшілік етіп жүрген Руслан Жұмағалиев – өңірдегі белсенді еріктілердің бірі. Қазір ол «ҚТЖ-Жүк тасымалы» ЖШС Батыс филиалы техникалық бөлім бастығының орынбасары қызметінде. Сонымен қатар, «Жеңіс» әлеуметтік-қайырымдылық жобасының Ақтөбедегі жетекшісі. Әрдайым теміржолшы ерікті жастарды бастап, жақсылықтың жаршысы болып жүреді. Бүгін «Үздік жастар кеңесі» номинациясының иегері атанып отырған Руслан Жұмағалиев өңірдің әлеуметтік- экономикалық дамуына қосқан үлесі мен белсенді азаматтық ұстанымы үшін арнайы диплом мен төсбелгіге ие болды.
«Теміржолшылар қоғам өмірінен ешуақытта тыс қалған емес. Әрдайым қарттар мен балалар үйі, Ұлы Отан соғысы ардагерлері, жалғызбасты қариялар және аз қамтылған отбасылардың шаңырағын аралап, қолдан келген көмегімізді жасап келеміз. Тәуелсіз еліміздің дамуына титтей де үлесімізді қоса алсақ, мақсатымыздың орындалғаны», – дейді Руслан Жұмағалиев.
«ҚТЖ-Жүк тасымалы» ЖШС Батыс филиалының басшысы Бөріхан Беркімбаев Русланның жүлдесін табыстап, қызметте абырой тіледі.