Табантежегіштерді бақылау айлығында 20-ға жуық тексерулер ұйымдастырылды

«ҚТЖ» ҰК» АҚ Қозғалыс қауіпсіздігi департаменті басшылығының ұйғарымымен ағымдағы жылдың қараша мен желтоқсан айында «Тежегіш табандық – ерекше бақылау!» айлығы өтті, деп хабарлайды Rail-news.kz. Шара барысында қауіпсіздікке нұқсан келтіретін факторларды жою және оны болдырмаудың басты қағидалары назарға алынды. Ақтөбе жүк тасымалы бөлімшесінде айлық барысында қызметкерлерді техникалық оқыту, қамтылуға тиіс нормативтік-техникалық құжаттамалардың орындалуы, қызметкерлердің еңбек міндеттерін бақылауды ұйымдастыру мәселелері жан-жақты қарастырылды. Нысандарды аралап, теміржолшылармен әңгімелесу ұйымдастырған басшылық құрам станция, вагон және локомотив деполарында өткен басқосуларды сұрақ-жауап форматындағы білім жарысына ұластырды.

«Тежегіш қауіпсіздігін бақылау айлығы барысында жиындар тек кеңседе өтпей, табантежегіштердің қалай жұмыс жасап тұрғанына, маневрлік жұмыстардың қауіпсіздігіне назар аударылып, өндіріс басында да жиі ұйымдастырылды. Қозғалыс қауіпсіздігін қамтамасыз ету бойынша жұмыс үнемі жетілдіруді талап етеді және теміржол көлігі саласында басым бағыт екені даусыз», – деді өңiрлiк бас мiндетiн уақытша атқарушы Қ.Әбілғазин.

Айлық барысында Ақтөбе учаскесі бойынша өңiрлiк ревизорлар аппараты іс-шаралардың орындалуын тұрақты қадағалауға алды. Апта сайын желілік деңгейдегі басшыларды тыңдау кеңестері өткізіліп, нәтижесінде 20-ға жуық тексерулер ұйымдастырылды. Жалпы, «Тежегіш табандық – ерекше бақылау!» айлығы барысында үш мыңға жуық жұмысшы техникалық сабақтарға қатысты. Кемшіліктерді анықтау шарасы барысында ұқыптылығы мен жауапкершілігі жоғары мамандардың еңбегі көпке үлгі етілді. Техникалық сабақтар кезінде машинистер мен станция кезекшілеріне маневрлік жұмыс жасау кезіндегі мұқияттылық ескертіліп, кірме жолда қозғалысты ұйымдастыру және қызмет көрсету тәртібі нұсқаулығының сәйкестігіне, дұрыстығына тексеріс жүргізу міндеттері қойылды.

«Жүргізілген жұмыстарды талдау негізінде оң динамика байқалды. Бұл айдың соңғы аптасында бұзушылықтар санының азаюымен көрінді. Технологиялық процестерді ұйымдастыру деңгейінің жоғарылағаны байқалды. Айлық кезінде табантежегіштерді пайдалануда қозғалыс қауіпсіздігін бұзу фактілері тіркелген жоқ», – дейді Қ.Әбілғазин.