Ерікті теміржолшылардың еңбегі ерен

Аймақтар

14.01.2022, 14:10

«Қазақстан теміржолшысы» газетінің тілшісі

Елімізде жер-жерде болған тәртіпсіздіктер кезінде Сексеуіл станциясында да пойыз қозғалысы тоқтап қалған болатын. Қаңтардың 5-6 күндері осы станциядағы теміржолшылар вокзал алдында тұрып қалған 2 пойыз бен ондағы жолаушыларға тамақ, су мен басқа да қажетті заттар жеткізіп, көмек көрсетті.

Бұл күндері еліміздің басына қара бұлт үйіріліп, мемлекеттің тұтастығына қатер төнді. Дегенмен елдің ауыз біршілігі жоғары болып, олар зардап шеккендерге қол ұшын созды. Солардың ішінде теміржолшылар да болды. Сексеуіл локомотив пайдалану депосы бастығының орынбасары Еркебұлан Аяғановтың айтуынша, станциядағы барлық құрылымдық бөлімшелердегі теміржолшылар арасынан шыққан еріктілер, әкімдік, жергілікті тұрғындар ауыз біріктіріп, вокзал алдында қазан-ошақ құрып, пойызда отырған жолаушыларға үздіксіз тамақ пісіріп берген.

- №78 Алматы-Маңғыстау пойызы Сексеуіл станциясына 5 қаңтарда таңғы сағат 6.13-те келіп, 34 сағат 19 минуттан кейін 6 қаңтарда сағат 16.52-де жолға шықты. Ішінде 489 жолаушы болды, соның 20-сы балалар. Сонымен қатар №112 Тальго пойызы 5 қаңтар сағат 14.01-де келіп, келесі күні сағат 16.39-ға дейін 28 сағат біздің станцияда тұрып қалды. Сондағы жолаушыларға станция халқы бірігіп, 10 қой сойып, 3 мезгіл тамақ берді. Оған қоса біздің станцияға жақын тұратын жолаушыларға еріктілер такси жалдап, бүлікшілерден аман-есен жолға салып жіберген, - дейді Е. Аяғанов.

Осы шаруаның басы-қасында жүрген Қызылорда ЖТ бөлімшесі директорының орынбасары Ерлан Айдаров та сол күндері Сексеуіл станциясында пойыздағы жолаушыларға көмек беруде негізінен теміржолшылар жұмыла кіріскенін айтады.

- Станциядағы жолшылар, вагон қараушылар, локомотившілер, электрмонтерлер, байланыс саласындағы теміржолшылар қолдан келгенше халықтың жағдайын жасады. Бір жағы бүлікшілер көтеріліп жатты, олардың да пойызға қауіп төндірмеуін ойлап, әскери күзетшілер де бір адамдай еңбек етті. Тамақ, судан бөлек, пойызда ауырып қалған үлкен кісілерге дәрі жеткізіп бердік. Вагондарға көмірді қаппен тасып, суды Қазалыдан құйғыздық, станциядағы ақылы дәретханалар иелерімен сөйлесіп, келісіп, оны да ұйымдастырдық. Әр теміржолшы кімнің үйінде қазан ошақ бар, кімде ыдыс-аяқ бар, бәрі барын сол перронға әкеліп, қолдан келген көмегін аямады, - дейді ол. Станцияға тоқтаған екі пойыз да Алматыдан шығып, Маңғыстау, Ақтөбе, Атырауға бет алған болатын. Екі тәуліктен кейін жол ашылғанда барлық жолаушылар аман-есен пойызбен әрі қарай межелі жерге жету үшін аттанып кеткен.

Сексеуілдіктердің бұл жақсылығы туралы сол жерде болған азаматтар да әлеуметтік желідегі парақшаларында бөлісуде. Солардың бірі Ержан Қожас есімді журналист: «Өткенде Арал Ауданына қарасты Сексеуіл кентінде пойыздардың көп уақыт аялдап қалғаны бар. 13 мыңнан астам халқы бар Сексеуіл жұрты жайбарақат қалды деймісіз?! Атай көрмеңіз. Шалдары шалт қимылдайтын бұл елдің жастары да жайбарақат емес еді. Әп-сәтте от жағылып, қазан асылып, табақ-табақ ет вагон біткенді жағалап кете барыпты. Ыстық сорпасына қоса шұбатын да сімірген пойыздағылар. Сенсеңіз сол, екі күн бойы жолда қаңтарылған жолаушы ағайынды үш мезгіл ыстық астан үзбепті. Өзім мұнда талай болғанмын. Тілшілік тіршілікпен. Сүйкімді жұрт еді бұл Сексеуіл. Сонысынан таймапты ғой. Тайдыра көрмесін, Тәңірі!» деп алғысын білдірген екен.