Семей ЖТ бөлімшесі бойынша қауіпсіздік шаралары күшейтілді
Абай облысы бойынша меншікті тілші
Еліміздегі соңғы уақыттағы орын алған келеңсіз оқиғаларға байланысты Семей ЖТ бөлімшесі бойынша қауіпсіздік шараларына басымдық берілген. Бұл ретте қоғамдық тәртіпті сақтау мен террорлық қауіптіліктің алдын алу және азаматтық қорғаныс бойынша жұмыстар күшейтілді, деп хабарлайды Rail-news.kz.
Әсіресе, желілік полиция қызметкерлеріне біршама салмақ түсіп тұр. Себебі, транзит ағыны мол Семей теміржолы бойынша қазіргі таңда желі бойындағы барлық мекемелердегі күзет күшейтілген. Әсіресе, вокзалдардағы қырағылық арттырылуда. Оған себеп те жоқ емес. Мәселен, жуырда Алматы қаласынан Семейге келіп жеткен №22 «Қызылорда-Семей» жолаушылар пойызынан түскен бір жолаушы азаматты темір қоршаудан бірнеше сөмкені асырып өткізбекші болып жатқан жерінен станцияның желілік полиция қызметкерлері ұстаған.
Сонымен қатар, көліктегі тәртіп сақшылары ел шығысы бойынша жолаушылар пойызындағы қоғамдық тәртіпті сақтауға күш салуда. Сондай-ақ, мародерлік іс-әрекеттер бойынша орын алған қылмыстарды ашуда вкзалдағы, жолаушылар пойыздарындағы тексерулерге түсіністікпен қарауға шақырады.
Қуаныш Қожаев